Улас түрын «Бэлиг» түбэй захирал Баир Балданов Үбэр Байгалай хизаарай ниигэмэй hалбариин хүдэлмэрилэгшэдэй мэргэжэл дээшэлүүлгын Агын дээдэ hургуулида буряад хэлэнэй асуудалнуудаар уулзалга ходорhон гарагай долоондо үнгэргэбэ.
Нютаг можонууд хоорондын «Сибириин хэлсээн» (МАСС) эблэлэй Болбосоролой болон эрдэм ухаанай талаар залан харгалзалгын зүблэлэй дэргэдэхи Сибириин болон Алас Дурнын арадуудай түрэл хэлэнүүдэй талаар ажалай бүлэг Үбэр Байгалай хизаарай ниислэл Шэтэ хото, мүн тиихэдэ Агын Буряадай тойрог хүрэхэ түсэбтэй.
Эвенк хэлэнэй ба соёлой Уласхоорондын «Эвэды дуннэ» фестиваль ноябриин 2-3-най үдэрнүүдтэ Шэтэ хотодо үнгэргэдэжэ, хаа-хаанаhаа түлөөлэгшэд, тэрэ тоодо — МАСС-ай ажалай бүлэгэйхид буугаад, түрэл хэлэнүүдэй асуудалнуудые зүбшэн хэлсэхэ юм.
Удаань Агын Буряадай тойрог ошожо, болбосоролой эмхи зургаануудта хүрэхэ, ажал хүдэлмэритэйнь, ажабайдал болон асуудалнуудтайнь танилсаха зорилготой.
Эдэ мэтые болон Шэтэдэ эмхидхэгдэхэ суглаанда зүбшэн хэлсэхэ, хэлэхэ, дуулгаха зүйлнүүд тухай, мүн баhа буряад хэлэ сахин хүгжөөхэ талаар баталагдаhан хэлсээнүүдэй хэр бэелүүлэгдэжэ байhан тухай хөөрэлдөөн болоо.
