Буряад хэлэеэ түрэл хэлэнэй зиндаагаар заажа эхилhээр 6 жэлэй дүнгүүдтэ зорюулан, Ивалгын аймагай Поселиин дунда hургуулиин үнгэргэhэн хэмжээ ябуулгада Улас түрын «Бэлиг» түбэй захирал Баир Балданов хабаадаа. Буряад хэлэнэй багшанарай семинар һургуулиин захирал Баир Ширапов суг ажалладаг эрхим багшанартаяа үүсхэһэн байгаа.
4-дэхи ангинуудта юумэнэй нэрын зохилдолдо зорюулагдаһан бэхижүүлгын хэшээл, «Арадуудай эб нэгэдэл» гэһэн классһаа гадуур хэмжээ ябуулга, гурбан жэлэй саада тээ Буряад Уласай эрхим анги боложо тодорһон, мүнөө 7-дохи «А» ангиин болоһон хүбүүд басагадай харша удхатай үгэнүүдтэй танилсахые, тэдэнэй классай хүтэлбэрилэгшын дүй дүршэлөө хубаалдахыень уригдаһан багшанар болон эрдэмтэд, түрэл хэлэ заалга эмхидхэгшэд адаглабад.
Буряад хэлэнэй хэшээлнүүдтэ һурагшадай зүб хэлэлгэ хүгжөөхэ, орёо абяануудые үгүүлжэ һургаха дүршэл мүн лэ харуулагдаа. Мүн тиихэдэ «Буряад хэлэн — манай омогорхол» гэһэн классһаа гадуур нээмэл хэмжээ ябуулга hургуулиин «Алтаргана» театрай дүй дүршэлһөө , мүн баһа аман зохёолтой танилсуулгын онол арга, нюусануудые дүршэл ехэтэй багшанар айлшадта харуулһан байха юм.
Эдэ бүгэдын манлай болоһон дүхэриг шэрээдэ удхатай хөөрэлдөөнэй эхин табигдажа, зургаан жэлэй туршада 2 мянга хахад шабинартай һургуулиин даашагүй ехэ ажалай зарим тэды дүнгүүд тухай хэлэгдээ.
- Дүүрэн ехэ дүн согсолон татаха гэбэл, дүрбэн хоногшье хүрэхэгүй һэн. Ушарынь гэхэдэ, арадайнгаа нэрэ хүндые, өөһэдынгөө элинсэг хулинсагые хүндэлжэ, үри бэедээ үндэһэн хэлэеэ дамжууулха гэжэ батаар шиидэһэн баабай, эжынэрэй, хүшэршье һаань, хүлһөө гаратараа оролдон, шудалан үзэжэ ябаһан шабинарай, эхэ һайхан хэлэеэ түрэл хэлэн гэжэ хүндэлжэ, дуугаржа, хэлэжэ һураагүй, дугай шахуу болоһон хүүгэдые тэрээндэ һурган заажа байгаа Поселиин багшанарай баатаршалгада зорюулагдаһан үдэр болобо. Уярхааршье, уйдахааршье, омогорхон һүгэдэхөөршье — олон ондоо мэдэрэл, бодол сэдьхэлдэм түрэжэ, намайе хүлгөөгөө, — гээд Баир Балданов тэмдэглээ.
Улас түрын «Бэлиг» түбэй захиралай һанамжаар, анхан иимэ программаар заагдажа байгаагүй газарта түрэл буряад хэлэ заалга эмхидхэхэ талаар Поселиин һургуулиин зургаан жэлэй дүй дүршэл жэшээ болгон, олондо тараажа, хаа-хаанагүй нэбтэрүүлхээр. Онол аргын хэмжээ ябуулгануудай ерэхэ жэлэй түсэбтэ заатагүй оруулхабди гэжэ Баир Балданов семинарта хабаадагшадта дуулгаа.














