«Түрэл хэлэнэй хэшээл» мүрысөөндэ хабаадагшадые «Бэлигэй» захирал амаршалаа

«Түрэл хэлэнэй хэшээл» мүрысөөндэ хабаадагшадые «Бэлигэй» захирал амаршалаа

Буряадай ниислэлдэ мүнөөдэр нютаг можонууд хоорондын «Түрэл хэлэнэй хэшээл» гэһэн мүрысөөн баярай оршон байдалда нээгдэбэ. Улас түрын багшанарай колледжын баяр ёһололой танхимда эмхидхэгдэһэн хэмжээ ябуулгада «Бэлиг» түбэй захирал Баир Балданов хабаадажа, тэндэ сугларһан зониие мэндэшэлэн амаршалаа.

  • Угсаата арадаймнай түүхэдэ, түрэл хэлэнэймнай хүгжэлтэдэ орёохон байдал тогтоод байна. Тиимэһээ мүнөөдэр ажалай жолоо гартаа барижа, арад зоноо хүтэлжэ ябаһан ноёд, дарганарай түрэл хэлэндээ, түүхэ соёлдоо хайшан гэжэ хандадагһаа, багшанарай болон хүмүүжүүлэгшэдэй эдэбхи үүсхэлһээ, үнэн шударгы, сэхэ сэбэр ажалһаа айхабтар ехэ юумэн дулдыдаха болоно. Тиимэ ушарһаа танай, ерээдүйн багшанарай, гарта түрэл хэлэнэймнай, арадаймнай хуби заяан барюулагдаха, — гээд мүрысөөнэй хабаадагшад болоһон оюутадта хандан, Баир Балданов хэлээ.

Гэр бүлын, нэн түрүүн эхэ эсэгэнэрэй, үбгэн, нагаса баабайнарай, хүгшэн, насага эжынэрэй, таабай төөбинэрэй, ахай эгэшэнэрэй нүлөөн буряад хэлэнэй ерээдүйдэ сэнгэшэгүй байха гээд «Бэлигэй» захирал тоолоно.

Буряад Уласай Толгойлогшо Алексей Цыденов, Арадай Хурал, Засагай газар, Болбосоролой болон эрдэм ухаанай яаман түрэл хэлэнүүдые сахин хүгжөөхэ ажалда горитой ехэ анхаралаа хандуулдаг, мүнгэ һомолодог гээд мэдээжэ.

Энэшье мүрысөө нютаг можонууд хоорондын хэмжээндэ үнгэргэлгэдэ «Буряад Уласта буряад хэлэ сахин хүгжөөлгэ» гэһэн Гүрэнэй программаһаа мүнгэн һомологдоһон байна.

  • Ондоо хэмжээ ябуулгада хараалагдаһан аад, алмагдаһан мүнгэ «Түрэл хэлэнэй хэшээл» мүрысөө үнгэргэхэ хэрэгтэ шэлжүүлэн дамжуулха тухай шиидхэбэри Буряад Уласай Болбосоролой болон эрдэм ухаанай яаман Улас түрын «Бэлиг» түбэй дурадхалаар абаһан байна. Энэ шиидхэбэри Буряад Уласай Мүнгэн һангай яаманай үсэгэлдэрэй захиралтаар батадхагдаа, — гээд Баир Балданов дуулгаа.

Нютаг можонууд хоорондын мүрысөөн үшөө хоёр үдэрэй туршада үргэлжэлхэ юм. 20 хабаадагшын урда — гурбан дабаан. Энэ гарагай табанда дүнгүүд согсологдожо, эрхимэй эрхимүүд элирүүлэгдэхээр түсэблэгдэнхэй.

Опубликовал(а)ГБУ РЦ Бэлиг
ГБУ РЦ «Бэлиг»
Издательство
У вас есть вопрос?
Связаться