«Шэнэ номой хуудаһа иран…», «Түрэл хэлэнүүдые үзэлгэдэ «Бэлиг» түбэй туһаламжа» гэһэн номой үзэсхэлэнгүүд Буряад хэлэнэй үдэртэ зорюулагдаһан баяр ёһололдо хабаадагшадай һонирхол татаhан байха юм.
Үзэсхэлэндэ хабаадагшад: томошуулшье, үхибүүдшье – өөртөө һонирхолтой юумэ олоо гэхэдэ, алдуу болохогүй. Уншагшадай шэнэ номуудтай танилсаhаниинь, зүбшэн хэлсэлгэдэ хабаадаhаниинь хэмжээ ябуулгын һонирхол татама хубинь болоо.
Һайндэртэ хабаадагшад шэнэ номуудай хуудаһануудые иража, эдээн тухай хөөрөө шагнахадаа, айхабтар туһатай, һонирхолтой мэдэсэ зүйл номууд дотор байна гэһэн тобшолол хээ.
Шэмэглэмэл гадартай, зохидхон зурагтай, шэнэ шэрээр анхилһан номууд хүн бүхэнэй дура татажа шадаа бшуу.
Хүүгэдтэ болон эдиршүүлдэ зорюулагдаһан, уншалгын номууд хотын һургуулинуудай бага болон дунда ангинуудай һурагшадай һонирхол татаа. Энэ болбол Дондог Улзытуевай, Галина Базаржаповагай, Эрдэни Дугаровай, Светлана Батуева-Урбанеевагай бүтээлнүүд болоно.
«Бэлиг» түб ахамад ангиин һурагшадташье, дунда мэргэжэлэй болбосоролой эмхи зургаануудай болон дээдэ һургуулинуудай оюутадташье хэблэлнүүдые дурадхаа. Болбосоролой программанууд, хэшээлдэ хэрэглэхэ hуралсалай онол аргын заабаринууд, багшын дүй дүршэлһөө материалнууд багшанарай анхарал татаа.
Угсаата соёлой шэглэлтэй шэнэ һуралсалай-онол аргын согсолборинууд хэмжээ ябуулгада хабаадагшадта арадай ёһо заншалда, түүхэдэ гамтайгаар хандаха, һонирхолтойгоор хөөрэхэ тухай хэлэжэ үгөө.
Оршуулгын хэблэлнүүдэй олон янзын байһан ушар томошуулые гайхуулһан байна. Ород хэлэндэ оршуулагдаһан мүнөө үеын буряад уран зохёолой суглуулбари, «Бэлиг» түбэй мэргэжэлтэдэй оршуулһан ба буряадаар барлагдаһан Монголой буряад уран зохёолшодой бүтээлнүүд уншагшадые илангаяа һонирхуулаа.
Николай Шабаевай буряадшалhан Чингиз Айтматовай «Далайн эрье зубшан гүйжэ ябадаг Алаг нохой», Владимир Намсараевай оршуулһан Антуан де Сент-Экзюперигэй «Бишыхан хан тайжа» гэһэн дэлхэйн классикын бүтээлнүүд эдэ номуудай дунда онсо һуури эзэлнэ.
Энээнһээ гадна, Гүрэнэй hуралсалай шэнэлэгдэhэн хэбүүдэй эрилтэдэ тааруулагдаhан hуралсалай-онол аргын хүсэд суглуулбаринууд үзэсхэлэндэ гол һуури эзэлээ. Энэ хадаа һуралсалай материал hурагшадай түргэн ойлгожо абаха хэрэгтэ аргагүй туһатай байха зохид хүтэлэлгэтэй: тусхай тэмдэгүүдтэй, бүлэглэлнүүдтэй, орёо бэшэ схемэнүүдтэй, мүнөө үеын эрилтэдэ тааруу номууд болоно.
