Уласай ниислэл Улаан-Үдэ хотодо жэл бүри соносхогдодог буряад хэлэнэй габшагай һара заншалта ёһоор мүнөөшье жэл үнгэргэгдэжэ, Банзарай Доржын нэрэмжэтэ Буряадай гүрэнэй ехэ һургуулиин шэнэ байшанай баяр ёһололой танхимда үсэгэлдэр дүнгүүдынь согсологдоһон байна. Энэ хэмжээ ябуулгада Улас түрын «Бэлиг» түбэй захирал, хотын захиргаанай дэргэдэхи буряад хэлэнэй талаар комиссиин гэшүүн Баир Балданов хабаадалсаа.
Улас дотороо гүрэнэй зэргэ зиндаатай буряад хэлэнэй оршон үргэдхэхэ, тэрэниие сэсэрлигүүдтэ болон һургуулинуудта зааха, хотын мантан ехэ байгууламжын олон ондоо һалбари, шэглэлнүүдээр дэлгэрүүлхэ, анхан бии байһан газарнуудтань бүримүһэн дэмжэхэ зорилготойгоор ябуулагдажа байгаа ажал бүри эршэдээ гээд онсолхо хэрэгтэй.
Ниислэл хотын бюджедһээ энэ ажалда һомологдодог мүнгэн хэды дахин ехэ болоо. Тиихэдээ шэхэндэ дуулдаха, нюдэндэ харагдаха үрэ дүнгүүдыньшье эли тодоор үзэгдэнэ. Гансал габшагай һарын үедэ бэшэ, харин түхэреэн жэлэй туршада түрэл хэлэнтэй холбоотой түсэлнүүд бүтэжэ, бэелүүлэгдэжэ байдаг болонхой. Ходоржо байгаа жэлдэ — илангаяа.
БГУ-гай шэнэ байшанай баяр ёһололой танхимай урдахи һаруул таһалгада Улаан-Үдымнай сэсэрлигүүд ба һургуулинууд, соёлой болон тамирай эмхи зургаанууд, олон тоото эдэбхитэд айхабтар һонирхолтой үзэсхэлэн дэлгэжэ, һайндэртэ ерэгшэдые баярлуулһан байха юм.
- Таб-яб гэмэ эмхидхэлтэй, тааруу зохид ябасатай, дээдын шанарай эрхилэлгэтэй ажалай яажа бүтэдэгые харахада урматай. Ниислэл хотын захиргаанай дэргэдэхи буряад хэлэнэй талаар комиссиин гэшүүн боложо уригдаһандаа, энэ ехэ ажалда хабаадалсажа байһандаа омогорхоноб, — гээд, амаршалгын үгэ хэлэхэдээ, Баир Балданов тэмдэглээ.
Орос Уласай арадуудай эб нэгэдэлэй жэлдэ, хотын байгуулагдаһаар 360 жэлэй ойдо зорюулагдан үргэргэгдэһэн түрэл хэлэнэй шэглэлтэй хэмжээ ябуулганууд, удха түгэлдэр түсэлнүүд 2026 ондо олон байгаа. Тэдэнэй дүнгүүд гаргагдажа, эрхимлэгшэдтэ үргэмжэлэл болон баярай бэшэгүүд, мүнгэн шангууд гардуулагдаа.
«Буряад хэлэнэй эрхим танхим» гэһэн хотын мүрысөөндэ шалгаржа, илалта туйлаһан болсборолой эмхи зургаануудай түлөөлэгшэдтэ Улас түрын «Бэлиг» түбэй захирал шангуудые барюулһан байна.














