Мэдээжэ француз уран зохёолшо Антуан де Сент-Экзюперигэй «Бишыхан хан тайжа» гэһэн туужа-онтохон дахинаа хэблэгдээ. Суута энэ зохёол буряадаар, ородоор барлагдажа, амяараа ном болоод, Улас түрын «Бэлиг» түбтэ нара хараһан байна.
Мэдээжэ ирагуу найрагша, Оросой Холбоото Уласай болон Буряад Уласай соёлой габьяата хүдэлмэрилэгшэ Владимир Намсараев энэ зохёол ниигэм журамта үедэ ород хэлэнһээ буряадшалһан юм. Тиин анха түрүүшынхиеэ ном боложо гараһан байгаа бшуу.
Уран зураашад Олег Цыремпилон, Сэсэг Дугарова хоёрой тааруу зохид зурагуудаар шэмэглэгдэһэн ушарһаа «Бишыхан хан тайжа» гэһэн шэб шэнэхэн ном үхибүүдэй, гэртэхинэй, буряад хэлэнэй багшанарай һонирхол заатагүй татаха байха гэжэ һанагдана. Дунда һургуулиин һурагшадта, мүн буряадаар уншаха дуратай үргэн олон уншагшадта мэдээжэ энэ зохёолой ээлжээтэ хэблэл зорюулан бүтээгдэбэ.
Номой сахим хэбынь Буряад Уласай Болбосоролой болон эрдэм ухаанай яаманай баталһан түсэбөөр бэлдэгдээд, «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр тэрэ барлагдаа. Уласай болбосоролой эмхи зургаануудаар тараагдаха.
