Үсэгэлдэр, Орос Уласай арадуудай хэлэнүүдэй үдэр, үргэн ехэ Эхэ ороноймнай бүхы нютаг можонуудта арадуудай түрэл хэлэнүүд дээрэ диктант бэшэгдээ.
Энэ ехэ хэмжээ ябуулгын эмхидхэгшэ Оросой Арадуудай Байшанай мэдээсэһээр, Буряад Уласһаа 200 гаран талмай бүридхэлдэ абтаhан байна. Тэдэнэй диилэнхи олониинь — болбосоролой hалбариин эмхи зургаанууд.
Тус хэмжээ ябуулга Буряад Уласта эмхидхэhэн Уласай «Бэлиг» түбэй тэмдэглэһээр, диктантын талмайнууд 180 гаран дунда һургуулида, мэргэжэлтэ дээдэ ба дунда болбосоролой 3-3 эмхи зургаанда эмхидхэгдээ.
60-аад гаран һургуулида диктант буряад хэлэн дээрэ үнгэргэгдөө, 30-аад һургуулинууд буряад, мүн ород хэлэн дээрэ бэшээ. Ная гаран һургуулида хабаадагшад ганса ород хэлэн дээрэ диктант бэшэhэн байха юм.
Улас дотор ажаһуудаг үсөөн тоото үндэhэн арадуудай түрэлхи хэлэнүүд дээрэшье диктант үнгэргэгдөө. Хурамхаанай ба Хойто-Байгалай аймагуудай гурбан hургуулида эвенк хэлэн дээрэ, харин Ахын Сорогой hоёдой интернат-һургуулида диктант һоёд хэлэн дээрэ бэшэгдэбэ.
Аймагай номой санда эмхидхэгдэhэн талмайда hурагшадаа хабаадуулhан Багдаринай эвенкын интернат-һургуули онсолон тэмдэглэхэ хэрэгтэй. Эндэ хэмжээ ябуулга хүүгэдыешье, томошуулыешье нэгэдүүлээ.
«Орос Улас – Арадуудай үлгы» гэһэн Бүгэдэ Оросой диктант хадаа түрэл хэлэнүүдтэ үхибүүдэй hонирхол дээшэлүүлхэ, эдир наһанһаа тэдэндээ гамтайгаар хандажа, сахижа ябаха хэрэгтэ нүлөөлхэ зорилготой.
Энэ хэмжээ ябуулгын тодорхойлогдоhон дүнгүүд тухай удаадахи мэдээсэлнүүдтэмнай уншаарайгты.
