Баргажанай аймагай Болбосоролой хүтэлбэриин гуйлтаар Улас түрын «Бэлиг» түб Буряад Уласай үндэһэтэнэй 1-дэхи лицей-интернадта Ивалгын аймагай Поселиин һургуулиин хабаадалгатайгаар, ниислэлэй 29-дэхи Буряад гимназида уулзалгануудые эмхидхэжэ, захирал Баир Балданов тэрэнэй орлогшо Оюна Забанова хоёр тус хэмжээ ябуулгануудта хабаадаба.
Баргажанай hургуулинуудай хүтэлбэрилэгшэд Улаан-Үдэ хото ерэжэ, буряад хэлэн болон уран зохёол зааха талаар асуудалнуудые зүбшэн хэлсэхэ хүсэлөө бэелүүлһэн байха юм.
Түрүү буряад hургуулинуудай хүтэлбэрилэгшэд — лицей-интернадай болон Поселиин һургуулиин захиралнуудай орлогшонор Дашама Цыбикова ба Юлия Шагжиева, 29-дэхи гимназиин захирал Баир Дониров Бутид Цыремпилова орлогшотоёо — эмхи зургаануудайнгаа ажабайдал, hуралсалай ябасын онсо шэнжэнүүд тухай хөөрөө. Буряад хэлэ ямар аргаар заажа, тэрэниие дэлгэрүүлхэ, хүгжөөхэ талаар дүй дүршэлөөрөө айлшадтай хубаалдаа.
Элдэб жасануудhаа үгтэдэг грантнуудай мүрысөөнүүдтэ тус hургуулинуудай хабаадажа шүүгээд абаһан мүнгөөрөө бэелүүлдэг түсэлнүүд тухай мэдээсэлынь айлшадта ехэ hайшаагдаа.
Буряад хэлэнэй габшагай hарада түрэлхи хэлэн болон уран зохёол үзэхэ, сахиха, хүгжөөхэ талаар олон хэмжээ ябуулганууд түсэблэгдэнхэй. Тэрэ тоодо — багшанарай дүй дүршэлөөрөө хубаалдаха зорилготой уулзалганууд, хуралдаанууд, дүхэриг шэрээнүүд.
Гэхэтэй хамта, иимэ уулзалганууд гансашье габшагай һарын үедэ бэшэ, харин hуралсалай жэлдэ хэды дахин үнгэргэгдэжэ байбал, ехэ hайн байха һэн гээд баргажанаархин дурадхаа.
