Хүн бүхэн үргэhэн эхэ эсэгэтэй, үдэhэн hайхан тоонтотой, дабташагүй түүхэ соёлтой. Теэд алтан дэлхэйдэ хүн боложо түрэхэдэмнай, эгээл түрүүн эжымнай түрэл хэлээрээ үлгын дуу энхэрэн дуулажа, энэрхы дулаахан үгэнүүдые хэлэдэг.
Тиин бидэнэр үгүүлжэ, хэлэжэ һуранабди, эгээл нангин «эжы», «Эхэ орон» гэһэн үгэнүүдые уншажа, бэшэжэ һуранабди. Түрэлхи нангин хэлээрээ буряад арадайнгаа түүхэ домогтой, үльгэр онтохонуудтай, оньһон үгэ, таабаринуудтай танилсанабди.
Буряад хэлэмнай айхабтар тодо, уян нугархай, хэлэшэгүй баян! Эгээл нангин, сэгнэшэгүй энэ баялигаа шудалжа, хамгаалжа, урган ябаhан залуу үетэндөө дамжуулая!
Хүндэтэ нютагаархид, багшанар, hурагшад, түрэлхид, үндэhэн буряад хэлэнэймнай эдэбхитэд!
Улас түрын «Бэлиг» түбэй зүгһөө та бүгэдэниие Буряад хэлэнэй баяраар үнэн зүрхэнhөө амаршалнабди!
Энэ һайндэртэ зорюулан бэлдэгдэһэн сахим амаршалгануудаа таанартаа бэлэглэнэбди. Бэе бэеэ амаршалагты, бүхы дэлхэйгээр тараагты!
Буригүй hайхан буряад хэлэмнай бүмбэрсэг дэлхэй дээрэ хэтын хэтэдэ зэдэлжэ байг лэ!
Үндэhэн хэлэнэй үдэрэй мэндэ хүргэнэбди!
