«Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова «Эдир Будамшуу» мүрысөөнэй хабадагшадые Буряад Уласай болбосоролой болон эрдэм ухаанай яаманай, мүн Улас түрын «Бэлиг» түбэй зүгһөө амаршалаа.
Уласхоорондын «Эдир Будамшуу» мүрысөөн үргэн дэлисэтэйгээр үнгэржэ, буряад хэлэнэй габшагай hарын hайндэрнүүдые заншалта ёhоороо түгэсхэхэ үндэр үүргэтэй байгаа. Хоца Намсараевай нэрэмжэтэ буряад драмын театрай тайзан дээрэ Буряад Уласай, Үбэр Байгалай хизаарай, Монгол Уласай хүбүүд бэлиг шадабарияа харуулбад. Эдир Будамшуунууд шүлэг болон монолог уншаха, дуу дуулаха гурбан шата дабажа гараа.
Тиигэжэ шангай гурбадахи hуури Захааминай аймагай 10 наһатай Тамир Галданов Монголой Улаан-Баатарай 17 наһатай Ганбаатар Билгуун хоёр хубаагаа. Хоёрдохи һуури Үбэр-Байгалай хизаарай Могойто тосхоной 9 наһатай Алдар Ринчино, нэгэдэхи һуури Буряад Уласай Хурамхаанай аймагай 11 наһатай Буин Аюшеев эзэлээ. «Эдир Будамшуу» мүрысөөнэй Гран-При шанда Үбэр-Байгалай хизаарай Ага тосхоной 12 наһатай Аюша Анудариев хүртэбэ.
Буряад хэлэ хүүгэдэй дунда дэлгэрүүлхэ, бэлигтэй бэрхэ хүбүүдые элирүүлжэ, ерээдүйн зүжэгшэдые урган хүмүүжүүлхэ болон бусад холын хараатай зорилгонуудтайгаар элитэ ехэ соёлшон, Оросой Холбоото Уласай арадай зүжэгшэн Михаил Гомбоевич Елбонов һанаашалан зохёоһон, наһа баратараа хүтэлбэрилжэ ябаһан юм. Мүнөө гэр бүлэнь, наһанайнь нүхэр, хэлэ бэшэгэй эрдэмэй дид-доктор Галина Дамбаевна Елбонова энэ һайхан хэрэгыень үргэлжэлүүлһээр.
Тус мүрысөөн «Буряад Уласта буряад хэлэ сахин хүгжөөлгэ» гэһэн Гүрэнэй программаар, тэрэ тоодо Буряад Уласай Болбосоролой болон эрдэм ухаанай яаманай дэмжэлгээр эмхидхэгдэнэ гэжэ тэмдэглэлтэй.
Һонин гэхэдэ, мүнөө жэлэй мүрысөөн хорин хоёрдохиёо үнгэргэгдэжэ, хорин хоёр хабаадагшатай байба гэжэ мэдүүлэе.
