Улас түрын «Бэлиг» түбэй Гүрэнэй оршуулгын албанай хүтэлбэрилэгшэ Дыжид Мархадаева Буряадай Уран зохёолшодой холбооной хүтэлбэрилхы зургаанай зүблөөндэ үсэгэлдэр хабаадажа, уран зохёол оршуулгын орёо асуудалнуудые зүбшэн хэлсэлгэдэ хабаадаа.
Юуб гэбэл, Буряадай Уран зохёолшодой холбооной түрүүлэгшэ Сергей Далаевич Доржиевай хэлэһээр, Москва хотодо үнгэргэгдэһэн Орос Уласай арадуудай уран зохёолой бага хуралай үедэ гол анхарал үндэһэн хэлэнүүдһээ ород хэлэндэ оршуулгын хэрэгтэ хандуулагдаһан байгаа.
Уран зохёол оршуулха гээшэ шиидхэгдээгүй олон асуудалтай хүндэхэн ажал юм гэжэ бултанда мэдээжэ. Тиимэһээ зүблөөндэ сугларагшадай һанамжаар, тус ажал олоной арга шадалаар бүтэхэ зэргэтэй. Нэн түрүүн уран зохёолшодһоо, оршуулагшадһаа бүридэһэн тусхай бүлэг байгуулжа, ород хэлэндэ оршуулха уран зохёолой зүйлнүүдые шэлэжэ абаад, ажаллажа эхилхэ шухала гэжэ онсо тэмдэглэгдээ.
Уридшалан абтаһан мэдээсэлэй ёһоор, оршуулганууд «Роман-газета» сэдхүүлдэ толилогдохоор хараалагдана. Гэбэшье Буряад Уластаа оршуулгын тусхай сэдхүүл байгуулжа, гансашье буряад уран зохёол ород хэлэндэ оршуулха бэшэ, харин ород уран зохёол буряадшалха тухай дурадхалнууд ороо.
Энэ ехэ һайн, холын хараатай үүсхэл. Хоёр зуу гаран хэлээр хөөрэлдэдэг хоёр зуугаад үндэһэ яһатаниие багтааһан мантан ехэ Орос гүрэнэй бүхы эрхэтэдэй бэе бэеэ ойлгохын, хамгаалхын, бэе бэетэеэ нүхэсэхын, хэтэдээ эбтэй эетэй байхын тула үндэһэ яһатанай соёл, түүхэ, ёһо заншал, һуудал байдал, хараа бодол, сэдьхэл тайлбарилдаг уран зохёолынь мүн лэ ород хэлэндэ оршуулагдаха ёһотой.
Буряад Уласта энэ талаар «Буряад уянга — ородоор» гэһэн түсэл 2023 онһоо бэелүүлэгдэнэ гэжэ һануулая. Энэ хадаа шүлэглэмэл зохёол оршуулгын мүрысөөн болоно. Тус хэмжээ ябуулгые Орос Уласай Оршуулагшадай холбооной Буряадай таһагай хүтэлбэрилэгшэ , хэлэ бэшэгэй эрдэмэй доктор, БГУ -гай профессор Полина Дашинимаева үүсхэжэ, Улас түрын «Бэлиг» түбэй захирал Баир Балданов бүримүһэн дэмжэжэ, буряад хэлэ сахин хүгжөөлгын программаһаа мүнгэ һомолхо дурадхал оруулһан юм.
Тиин тус мүрысөөн мүнөө жэл дүрбэдэхиеэ үнгэргэгдэхэнь. Эмхидхэн байгуулагшадынь — Буряад Уласай соёлой ба болбосоролой болон эрдэм ухаанай яаманууд. Буряад Уласай Үндэһэтэнэй номой сан, Улас түрын «Бэлиг» түб, Орос Уласай Оршуулагшадай холбооной Буряадай таһаг, Доржо Банзаровай нэрэмжэтэ Буряадай гүрэнэй ехэ һургуули тэрэниие хамтаржа үнгэргэдэг гээд онсолон тэмдэглэлтэй.
