Ходорhон гарагай табанда Хурамхаанай аймагай Барханай дунда hургуулида үнгэргэгдэhэн «Буряад арадай аман зохёолой юртэмсэ» гэhэн баяр найрта Улас түрын «Бэлиг» түбэй захирал Баир Балданов хабаадаа.
Угсаата соёлой шэглэлтэй болбосоролой эмхи зургаануудай эблэлэй түрүүлэгшэ Булат Шойнжоновой, ниитын энэ эмхи зургаанай гэшүүн болодог Барханай hургуулиин эдэбхи үүсхэлээр энэ хэмжээ ябуулга анха түрүүшынхиеэ эмхидхэгдэhэн байна.
Үндэhэн hургуулинуудай эблэлдэ ородог эмхи зургаануудай — Буряадай Улас түрын 1-дэхи лицей-интернадай, Захааминай Сахирай, Зэдын Цагаатайн, Яруунын Иисэнгын, Баргажанай Уланай, Ивалгын Поселиин дунда hургуулинуудай 9-9 hурагшадhаа бүридэhэн бүлэгүүд багшанартаяа хамта Бархан уулын хормойдо буугаад, эрхим бэлигээ, түрэл хэлээрээ харилсаха шадабарияа харуулаа.
Оньhон үгэнүүдые олоор мэдэхэ, таатайхан таабаринуудые таhалгаряагүй тааха шадалтай, арадай дуунай аялгын жолоо гартаа адхаhан hурагшад уласаймнай эрхим hургуулинуудта олон байна гэжэ эндэ харагдаа.
- Ёhо заншал тайзан дээрэ харуулха гэhэн гэрэй даабари бүлгэмүүд мүн лэ эрхимээр дүүргээд ерэhэн байгаа. Энэнь тон hайшаалтай, — гэжэ Баир Балданов тэмдэглэнэ.
«Бэлиг» түбэй захиралай мэдээсэhээр, тус хэмжээ ябуулга түрүүшынхиеэ үнгэргэгдөө. Хурамхаанай амагай Болбосоролой хүтэлбэри, Барханай сомон, hургуулиин багшанар болон бусад ажаллагшад, hайн дураараа эбээн тэдхэгшэд хамтаржа, дүн хамта 300 гаран мянган түхэриг суглуулаад, энэ найр үндэр хэмжээндэ үнгэргөө.
Удха шанар ехэтэй энэ хэмжээ ябуулга саг үргэлжэ үнгэргэдэг болохын тула буряад хэлэ сахин хүгжөөлгын Гүрэнэй программын тэдхэмжэ хэрэгтэй. Энээн тухай дурадхал Буряад Уласай Болбосоролой болон эрдэм ухаанай яаманда оруулагдаха юм.
















