Буряадай арадай ирагуу найрагша, мэдээжэ сэдхүүлшэн Галина Базаржаповагай «Илалтын маршал – Буряад орондо» гэһэн ном Улас түрын «Бэлиг» түбтэ нара хараа.
Буряад орондо олон жэлдэ алба хэhэн, удаань дэлхэйдэ суутай жанжан болоhон Константин Рокоссовскиин намтар, дайшалхы ябуулга тухай баримтата-публицис энэ ном дотороо зохёогшо хөөрэнэ.
Ивалгын болон Тапхарай дунда hургуулинуудай hурагшадай шэнжэлхы хүдэлмэридэ хандан, hонирхолтойгоор, уран аргануудые хэрэглэн, зохёолоо бүтээгээ. Иигэжэ дайнай Баатарай дүрые харуулна.
– Константин Рокосовскиин нэрэ дам мүнхэлхэ, эдир залуу үетэндэ ойлгуулжа үгэхэ хэрэгтэй. Ямаршье сагта Эхэ орон, эрхэ сүлөө, эрэлхэг зориг, эгэршэгүй эрмэлзэл гэhэн ойлгосонууд хуушардаггүй, балартадаггүй. Энэ ойлгосонууд – нангин. Илангаяа мүнөө баруун зүгтэ нацис булимтарагшадай хүсэрхэн орожо байhaн сагта манай сэрэгүүд hүр hүлдэ ехэтэйгээр жагсаhаар, дабшаhaaр. Урдымнай түүхэ – удхатай жэшээ, – гээд Галина Базаржапова тэмдэглэнэ.
К.К. Рокоссовский тухай ном буряадаар эгээл түрүүшынхиеэ хэблэгдэбэ. Ахамад ангиин hурагшадта, оюутадта, түрэлхи хэлээрээ уншаха дуратайшуулда зорюулагдана.
Уншагшадай сэдьхэлыень татажа, ухаан бодолыень баяжуулхаһаа гадна мүнөө сагай буряад уран зохёолдо ехэ нэмэри боложо үгэхэ гэжэ найданабди.
Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түб номой хэб бэлдээд, «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр барлуулаа гэжэ тэмдэглэлтэй. Тус ном болбосоролой эмхи зургаануудаар тараагдажа байнхай.
