Буряад хэлэнэй габшагай hарын түсэбүүдтэ зорюулагдажа, Буряад Уласай Толгойлогшын ба Засагай газарай захиргаанай Үндэhэ яhатан хоорондын харилсаануудай болон эрхэтэнэй үүсхэл хүгжөөлгын хороондо үсэгэлдэр болоhон зүблөөндэ Улас түрын «Бэлиг» түбэй захирал Баяр Балданов хабаадаа.
Түрэлхи хэлэндэ зорюулагдаhан, тэрэнэй хүндэлэлдэ үнгэргэгдэхөөр хараалагдаhан хэмжээ ябуулганууд бүхы улас дотор хэмгүй олоор эмхидхэгдэжэ эхилэнхэй гээд зүблөөндэ хэлэгдээ.
Засагай зургаануудай залан хүтэлhэнэй ашаар арад зон соомнай аймагууд болон тойрогууд дотор, хото хүдөөдэ — илгаагүй, уян нугархай хэлэнэймнай урилдаануудай, сэсэ буляалдаанай, сэнтэй зугаа нааданай булагууд бурьялжал байна.
Энэ hарын 23-да Буряад хэлэнэй үдэр заншалта ёhоор буряад драмын театрта эмхидхэгдэхэ юм. Yндэhэн хэлэндэ зорюулагдаhан, тэрэниие сахин хүгжөөхэ талаар ажал харуулhан үзэсхэлэн дэлгээгдэхэ.
Түрэлхи хэлэнэй талаар түрын бодолго бэелүүлгэдэ хабаададаг засагай зургаанууд, бүхы эмхинүүд, дээдэ, дунда мэргэжэл олгодог, мүн баhа юрэнхы болбосоролой hургуулинууд өөhэдынгөө түсэлнүүдые олоной үзэмжэдэ дурадхаха юм.
Буряад Уласай Толгойлогшын тогтооhон «Үндэhэн хэлэнэй үлзы хэшэг» шанда хүртэгшэдые хүндэлэн, шангуудые барюулха ёhолол үнгэргэгдэхэ юм.
Гадна, баярай тоглолтодонь Буряадай суута соёлшод хабаадажа, шэхэнэй шэмэг, нюдэнэй хужар болохо уран бэлигэйнгээ зүйл арад зондоо харуулха.
- Оросой Холбоото Уласай арадуудай эб нэгэдэлэй жэлэй сэдэбээр hайндэрөө үнгэргэхэ гэжэ хэлсээбди. Өөhэдынгөө hанамжа элирхэйлэн, саашадаа габшагай hараяа яажа бүри hайнаар үнгэргэхэ тухай хэдэн дурадхал оруулаабди, — гээд «Бэлигэй» захирал Баир Балданов тэмдэглэhэн байна.
