Улас түрын «Бэлиг» түбэй захирал, Бүгэдэ буряадай үндэhэн соёлой эблэлэй нэгэдэхи дид-юрэнхылэгшэ Баир Балданов Буряадай улас түрын 1-дэхи лицей-интернадай 9-11 ангинуудай hурагшадтай Эрдэм мэдэсын хэшээл мүнөөдэр үнгэргэбэ.
— Түрэл хэлэнэймнай саашанхи хүгжэлтэ, хуби заяаниинь ямар байхаб, мүнөөнэй зондо тэрэ хэрэгтэй гү, али үгы гү гэhэн асуудалнуудта hурагшадтай хамта харюу бэдэрээбди, — гээд тэрэ тэмдэглээ.
Сэрэгэй тусхай ябуулгын газарта түрэл хэлэмнай сэрэгшэдэймнай ами наhа абарна. Түрэл хэлээрээ бурхандаа зальбаржа ханданабди. Энэ хоёрhоо гадуур хэдэн олон бусад ушарнуудта, ажабайдалдамнай түрэл хэлэмнай заатагүй хэрэгтэй болоно гэhэн бодолыень лицейн hурагшад дэмжэhэн байха юм.
Түргэдэhэн сагтай хамта тэрэнээ хүгжөөжэ, шэнын оньhондо оруулха талаар hүүлэй арба гаран жэлэй ажал тухай Баир Балданов тобшохоноор хөөрөө.
«Бэлиг» түбэй болон хабаадуулагдаhан бусад мэргэжэлтэдэй хүсөөр «Яндексын» ямар туhа хангамжануудта буряад хэлэнэй ороод, хүн бүхэнэй хэрэглэхээр болоhые бодото дээрэнь харуулаа. Ахалагша ангинуудай шабинар энэ мэдээсэл hонирхон шагнаhан байна.
— Манай гүрэнэй hургуулинуудта далаад гаран хэлэнүүд заагдана. Олон ондоонуудшье hаа, хамтадаа нэгэл агууехэ Эхэ оронтой арад гээшэбди. Гүрэн түрымнай хүтэлбэрилэгшэд, манай Юрэнхылэгшэ Владимир Владимирович Путин арадуудай түрэл хэлэнүүдэй хүгжэлтэдэ айхабтар ехэ анхарал хандуулна, — гэжэ хэшээлэй эсэстэ Баир Балданов hурагшадта ойлгуулан хэлээ.
