Улас түрын «Бэлиг» түбэй захирал, Бүгэдэ буряадай үндэhэн соёлой эблэлэй нэгэдэхи дид-юрэнхылэгшэ Баир Балданов буряад соёл дэмжэлгын ба хүгжөөлгын Санкт-Петербургын «Ая Ганга» жаса руу албанай хэрэгээр үсэгэлдэр айлшалаа.
Жасын юрэнхылэгшэ Цырендари Самбуеватай уулзажа, хойто ниислэлдэ түбхинэн ажаhуудаг буряад угсаатанай ниитын энэ эмхиин ябуулжа байгаа ажал хэрэгүүд тухай хөөрэлдэhэн байна. Түрэл дайдаhаа холо ажамидардаг нютагаархидай сугларха, хөөрэлдэхэ, элдэб түсэл бэелүүлхэ, баяр найраа үнгэргэхэ өөрын байратай болоhониинь hайшаалтай.
Түрэлхи хэлэ, соёлдоо хүүгэдээ дадхаан hургаха, Санкт-Петербург хотодо үнгэргэгдэдэг олон тоото хэмжээ ябуулгануудта хабаадаха талаар, нютагаархидаа, илангаяа hая ерэhэн зониие, оюутадые дэмжэн харгалзалха талаар айхабтар ехэ ажал «Ая ганга» жасынхид ябуулдаг юм.
Мэдээжэ эрдэмтэн, гүн ухаанай эрдэмэй доктор, профессор Асалхан Ользонович Бороноев олон жэлдэ эмхиие хүтэлбэрилhэн намтартай.
«Ая гангые» эмхидхэн байгуулагшадай нэгэн, мүнөө тэрэниие хүтэлбэрилдэг Цырендари Аюровна Самбуевагай элшэ хүсөөр, эдэбхи үүсхэлээр, эрмэлзэлээр диилэнхи олон түсэлнүүд бүтэдэг гээд олондо мэдээжэ.
- Бүгэдэ буряадай үндэhэн соёлой эблэлэй hүүлэй үедн эмхидхэдэг хэмжээ ябуулгануудта хойто ниислэлдэ ажаhуудаг нютагаархимнай эдэбхитэйгээр хабаададаг. Түрэлхи хэлэеэ шудалха хэрэгтэнь Петербургын буряад хүүгэдтэ «Бэлиг» түбшье номуудые эльгээжэ туhалhан байха, — гээд Баир Балданов онсолоо.
Саашадаашье хамтын ажалаа үргэлжэлүүлхэ тухай «Ая ганга» жасын болон «Бэлиг» түбэй хүтэлбэрилэгшэд хэлсэhэн байха юм.
