«Юун табарааб?» гэһэн ном «Бэлиг» түбтэ бүтээгдээ

«Юун табарааб?» гэһэн ном «Бэлиг» түбтэ бүтээгдээ

Буряадай мэдээжэ уран зохёолшо Эрдэни Дугаровай үхибүүдтэ зорюулагдаһан «Юун табарааб?» гэһэн ном Улас түрын «Бэлиг» түбтэ нара хараба. Тус согсолбори соо жороо үгэнүүд оронхой. Тэдээнһээ гадна хуудаһанай сэдэбтэ тааруулагдаһан таабаринууд үгтэнхэй.

Хүүгэдтэ зорюулан бэшэхэ гээшэ тиимэ бэлэн хэрэг бэшэ. Нэн түрүүн хүүгэдэй мэдэрэл, һанаа бодол ойлгожо, досоохииень урбуулан һэргээжэ шадаха оньһон хэрэгтэй. Эрдэни Дугаровай зохёолнууд энэ эрилтэдэ тон таарама гээд тэмдэглэлтэй. Тэрэнэй шүлэгүүдэйнь найруулга уян нугархай, ульгам хэлээр бэшэгдэнхэй, уран арганууд үргэнөөр хэрэглэгдэнхэй. Уран зохёолнуудынь багахан үхибүүдэй наһанда тааруулжа бэшэгдэһэн байдаг.

Уран зохёолшо түрэл арадайнгаа дууhашагүй аман үгын баялигые уудалжа, үхибүүдэй хэрэглэхэ сэгнэшэгүй ехэ үүргэтэй согсолбори бэлдэбэ гээшэ.

Эрдэни Дугаровай зохёол эдир уншагшадай, гэртэхинэй, буряад хэлэнэй багшанарай, хүмүүжүүлэгшэдэй һонирхол заатагүй татаха байха. Үхибүүд эдэ жороо үгэнүүдые уншажа, таабаринуудые таажа, сүлөө сагаа үнгэргэхэнь лабтай. Багшанарай, хүмүүжүүлэгшэдэй шабинарайнгаа хэлэлгые хүгжөөхын, нугархай болгохын, хэлэнэйнь нөөсые баяжуулхын тула хэрэглэхэдэ аргагүй ехэ туһатай согсолбори болоо гээд хэлэлтэй.

Энээхэн ном уран зурааша Баир Ринчиновэй зурагуудаар шэмэглэгдэнхэй.

Тус ном һургуулида ороодүй үхибүүдтэ, hурагшадта зорюулагдаһан ушарһаа Буряад Уласай Болбосоролой болон эрдэм ухаанай яаманай баталһан түсэбөөр сахим хэбынь Улас түрын «Бэлиг» түбтэ эхинһээ эсэстээ хүрэтэр бэлдэгдэһэн байна.

«Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр тэрэ барлагдаба. Номой хэһэг болбосоролой эмхи зургаануудаар тараагдаха.

Опубликовал(а)ГБУ РЦ Бэлиг
ГБУ РЦ «Бэлиг»
Издательство
У вас есть вопрос?
Связаться