Түрэл хэлэнэй болон уран зохёолой эрхим багшанарай Бүгэдэ Оросой мэргэжэлтэ мүрысөөндэ Буряад Уласаа түлөөлжэ, Липецк хото мордохоёо бэлдэжэ байгаа багшанартай Буряад Уласай болбосоролой болон эрдэм ухаанай сайд Валерий Поздняковой үнгэргэhэн уулзалгада Улас түрын «Бэлиг» түбэй хүтэлбэрилэгшэд — захирал Баир Балданов, захиралай орлогшо Оюна Забанова хабаадаба.
Уласхоорондын «Эрхим багша-2026» мүрысөөндэ илагша, Улаан-Үдэ хотын 29-дэхи Буряад гимназиин багша Арюна Цыжипхенова, улас түрын «Эрхим хүмүүжүүлэгшэ-2026» мүрысөөндэ эрхимлэгшэ, ниислэлэй «Подснежник» гэhэн 67-дохи хүүгэдэй сэсэрлигэй хүмүүжүүлэгшэ Баирма Гумпылова хоёр дэмжэлгын бүлгэмүүдтэеэ хамта энэ долоондо Липецк хото мордохонь.
— Гүрэн түрын хэмжээндэ табадахияа эмхидхэгдэжэ байhан энэ мүрысөөндэ Буряад ороноо, түрэл хэлэеэ түлөөлхэ гээшэ — аргагүй ехэ харюусалгатай үүргэ. Эрхим бэрхээр тэрэниие дүүргэжэ ерэхэ байhандатнай этигэнэб, амжалта хүсэнэб, — гээд сайд үреэгээ.
Эрхим медиатанилсуулгануудай түлөө дуугаа үгэлгэ мүнөө жэл сахим аргаар үнгэргэгдэхэ юм. Тэрээндэ нютагаархинайнгаа эдэбхитэйгээр хабаадахые эмхидхэхэбди гэжэ Валерий Анатольевич тэмдэглэhэн байна.
Жэл бүриин энэ мүрысөөндэ манай уласай түлөөлэгшэдэй хабаадаха хэрэгтэ «Буряад Уласта буряад хэлэ сахин хүгжөөлгэ» гэhэн гүрэнэй программаар дэмжэлгэ үзүүлэгдэдэг. Мүнөө жэл энэ асуудалай яажа шиидхэгдэхээр хараалагдаhан тухай «Бэлиг» түбэй захирал Баир Балданов уулзалгада хабаадагшадта тайлбарилан хөөрэhэн байна.
