Улас түрын «Бэлиг» түбтэ 5-9 ангинуудай һурагшадай түрэл буряад хэлээр үзэхэ һуралсалай номуудай хэбүүдые уридшалан зүбшэн хэлсэлгын зүблөөн түбэй захирал Баир Балдановай хүтэлбэри доро үнгэргэгдэһэн байна.
Оросой эрдэмэй академиин Сибириин таһагай монгол судлалай, буддын шажан болон түбэд шэнжэлэлгын хүреэлэнэй ахамад эрдэмтэ хүдэлмэрилэгшэ, хэлэ бэшэгэй эрдэмэй доктор, доцент Бабасан Цыренов, Улас түрын буряад үндэһэтэнэй 1-дэхи лицей-интернадай буряад хэлэнэй болон уран зохёолой багша, хэлэ бэшэгэй эрдэмэй дид-доктор Дулма Шойнжонова, «Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова, мүн хинан заһалгын-хэблэлэй таһагай дарга, хэлэ бэшэгэй эрдэмэй дид-доктор Оюна Цыцыкова зүблөөндэ хабаадаба.
Зохёогдоһон һуралсалай шэнэ номуудай хэбүүдые шэнжэлэн сэгнэхэ тухай Оросой арадуудай түрэл хэлэнүүдэй холбоото уласай институдай албан ёһоной гуйлтаар Буряад Уласай Болбосоролой болон эрдэм ухаанай яаман дээрэ нэрлэгдэһэн эрдэмтэдые, багшанарые болон мэргэжэлтэдые элирхэйлжэ, тус ажал дүүргэхыень даалгаһан байгаа.
Баир Балдановай тэмдэглэһээр, 5-9-дэхи ангинуудай номууд юрэл бэшэгэй дүримүүдэй суглуулбари бэшэ, харин мүнөө үеын һурагшадые буряад хэлэеэ мэдэхэ, тэрэнээ сахижа һургахын хажуугаар, түрэл хэлэнэй баялигтай танилсуулха үндэр үүргэтэй.
Шүүмжэлэн сэгнэгшэд ерэхэ долоон хоногой дүүрэтэр һанамжаяа гуримшуулжа, бүхы дурадхалнуудаа тодорхойлон бүрилдүүлхэ түсэбтэй. Удаань тэдэнээ холбоото уласай институт руу дамжуулха болоно.
