Мэдээжэ эрдэмтэн, багша, һурган хүмүүжүүлгын эрдэмэй доктор, профессор, Оросой Болбосоролой академиин гэшүүн-корреспондент Эрхито Раднаевич Раднаевай нэрэмжэтэ танхим нээлгын баяр ёһололдо Улас түрын «Бэлиг» түбэй захирал Баир Балданов хабаадаба.
Дурасхаалай энэ үйлэ хэрэг Эрхито Раднаевич Раднаевай түрэһөөр 95 жэлэй ойдо зорюулагдан үнгэргэгдэһэн хэдэн хэмжээ ябуулгын нэгэ болоо гээд тэмдэглэлтэй.
Буряад Уласай Болбосоролой болон эрдэм ухаанай сайд Валерий Поздняковой болон өөрынгөө, «Бэлиг» түбэй бүхы мэргэжэлтэдэй болон ажалшадай зүгһөө сугларагшадые амаршалан мэндэшэлээд, нээгдэжэ байһан танхимда хадаглагдажа, оюутадай һуралсал болон дадал гарахадаа үзэхэ, хэрэглэхэ номуудые Баир Балданов бэлэг болгон бариһан байха юм.
Лубсан Доржиевич Шагдаров ба Норпол Аюшеевич Очиров хоёрой зохёон согсолһон, мүнөө үедэ хоморой болоһон «Ород-буряад толиин» табан шэрхэг танхимда үгтэбэ. Энэ толи тухай хуряангыгаар хөөрэхэдөө, суута сайд, һурган хүмүүжүүлгын эрдэмэй доктор Сергей Дашинимаевич Намсараевай хүтэлбэри доро, алдарта уран зохёолшо, түүхын эрдэмэй доктор Ардан Лопсонович Ангархаевай «Буряад үнэн» хэблэлэй байшаниие толгойлжо байха үедэ буряад арадай үзүүр, дээжэ хүбүүд басагадай — эрдэмтэд болон багшанарай, уран зохёолшод ба ирагуу найрагшадай, элитэ ехэ сэдхүүлшэд ба эрхилэгшэдэй хабаадалгатайгаар бүтэһэн тухайнь онсолон тэмдэглээ.
Мүн тиихэдэ Болбсоролой болон эрдэм ухаанай сайдай даабаряар Э.Р. Раднаевай нэрэмжэтэ танхимда «Бэлиг» түбэй бэлдэжэ барлан гаргаһан һургуулида үзэгдэдэг буряад хэлэнэй ба уран зохёолой номууд дамжуулагдаа.
— Орон дотороо мэдээжэ томо эрдэмтэн, дээдэ болбосоролой эмхидхэлшэ, буряад хэлэнэй хүгжэлтэдэ горитой хубитаяа оруулһан, тэрэнэй ерээдүйе элирхэйлхэ мэргэжэлтэдэй бэлэдхэлдэ айхабтар ехэ нүлөө үзүүлжэ шадаһан хүнэй — хэдэн үе багшанарай эрхим багша, манай һалбариин декан байһан хүндэтэ Эрхито Раднаевич Раднаевай нэрэмжэтэ танхимай Буряадай гүрэнэй ехэ һургуулида нээгдэһэн ушарта ехэтэ баярланабди. Ашата багшымнай алдарта нэрые мүнхэлһэн үшөө нэгэ һайхан хэрэг бүтэбэ, — гээд Баир Балданов һанамжаяа хубаалдаа.
