Эрхүү можын Усть-Ордагай Буряадай тойрогой захиргаанай үндэһэн хэлэнүүдэй талаар таһагай ходорһон долоондо үнгэргэһэн суглаанда «Бэлиг» түбэй захирал Баир Балданов хабаадаба. Тус хэмжээ ябуулгада үндэһэн хэлэнэй саашанхи хүгжэлтэдэ нүлөөлхэ зэргэтэй шэнэ түсэлнүүд тухай тэрэ элидхэл хэһэн байна.
— Буряад угсаатанай хэр угһаа хойшо ажамидардаг нютаг можонууд хоорондын түрэл хэлэеэ сахин үлөөхэ, хүгжөөхэ зорилготой хамтын хэмжээ ябуулганууд тухай, мүн баһа үндэһэн хэлэеэ сахим юртэмсэдэ оруулха талаар шэнэ түсэлнүүд тухай хөөрөөб. Энэ ажал ганса Буряад Уласта бэшэ, мүн хүршэ хоёр нютаг можодомнай, тэндэхи угсаатанаймнай түлөөлэгшэдтэй хамта ябуулагдаха зэргэтэй, — гэжэ Баир Балданов тоолоно.
Мүн баһа Усть-Ордагай Буряадай тойрогой захиргаанай амжалтататайгаар бэелүүлэгдэһэн түсэлнүүдые «Бэлиг» түбэй захирал дурдаха зуураа, Эрхүү можын гүрэнэй бодолгодо угсаатай соёлой шэглэлтэй түсэлнүүдэй олошороо һаа, хэлэнэймнай байдал һайн тээшээ хубилха, — гэжэ Баир Балданов тоолоно.
Үндэhэн хэлэнүүдэй талаар таhагай зүбшэлэгшэ Ирина Багдуева аймагуудай болбосоролой хүтэлбэринүүдэй түрэл хэлэ сахин хүгжөөхэ талаар ажал сэгнэлгын дүнгүүд тухай мэдээсээ. Тойрогой 6 аймагһаа гадна Ангарскын хотын тойрог, Эрхүүгэй, Хаашагай болон Ойхоной аймагууд энэ сэгнэлгэдэ хабаадаһан юм. Бусад хабаадагшадhаа олон хамтын балл абаhан Оhын аймаг илагша болон тодороо. 2-дохи hуурида Нүхэдэй аймагай болбосоролой хүтэлбэри гараба. Гурбадахи hуури Боохоной аймаг эзэлһэн байна.
Yндэhэн хэлэнүүдэй талаар таhагай дарга Вероника Харбанова сэгнэлгын дүнгүүдээр илагшада болон шангай һуури эзэлэгшэдтэ үргэмжэлэлнүүдые ба шангуудые барюулаа.
Буряадай зохеолшодой дүрэ зурагуудаар илагшад урмашуулагдаа.
«Бэлиг» түбтэ нара хараһан 6-дахи ангида үзэхэ буряад хэлэнэй hуралсалай номуудые hургуулинуудтаа тараахыень аймагуудай болбосоролой хүтэлбэринүүдтэ тойрогой захиргаан дамжуулаа.
Суглаанай һүүлдэ тойрогой захиргаанай үндэһэн хэлэнүүдэй талаар таһагай мэргэжэлтэдтэй саашадаа бүтээхэ хамтын асуудалнуудаар зүбшэн хэлсэлгэ боложо, нютаг можонууд хоорондо түсэлнүүд хараалагдаһан байна.
