Улас түрын «Бэлиг» түбэй хүтэлбэрилэгшэд — захирал Баир Балданов захиралай орлогшо Оюна Забанова хоёр буряад хэлэнэй сахим номоор үнгэргэгдэдэг заншалта «Эхэ хэлэн» гэһэн мүрысөөнэй хэмжээ ябуулгануудта үсэгэлдэр хабаадаба.
Нээлтын баяр ёһололдо амаршалгын үгэ хэлэхэдээ, Баир Балданов сэрэгэй тусхай ябуулгын газарһаа түбэй сэдхүүлшэдэй бэлдэжэ харуулһан репортажуудай, бэшэжэ тунхаглаһан толилолгонуудай хэһэгүүдые суглуулжа бүридхэһэн «Режим Б» ролик сугларагшадта харуулаа.
— Түрэл хэлэнэйнгээ туһаар манай баатар сэрэгшэд ямар олон суг албатанайнгаа ами наһа абарнаб, илалтаяа дүтэлүүлнэ гээшэб! Элинсэг хулинсагайнгаа энэ болотор нангинаар сахин хадагалжа асарһан үндэһэн түрэл хэлэеэ мэдээд ябаха гээшэмнай ами наһанай асуудал гэжэ булта ойлгохо ёһотойбди, — гээд «Бэлигэй» захирал тэмдэглээ.
Шабинараа мүрысөөндэ бэлдээд абажа ерэһэн багшанартай амяараа суглаан эмхидхэгдэжэ, «Бэлиг» түбэй хүтэлбэрилэгшэд мүн лэ хабаадаһан байна.
Мүнөө жэлэй һуралсалай жэлэй түсэблэлгэ, шэнэ номуудые зохёон гаргалга болон бусад шэглэлнүүдээр «Бэлиг» түбэй эрхилдэг ажаябуулга тухай Баир Балданов хөөрөө. Тиихэдээ Буряад Уласай Толгойлогшо Алексей Цыденовэй даабаряар һургуулинуудта гүрэнэй буряад хэлэнэй хоёр хэшээл долоон хоногой туршада заабол үнгэргэгдэхэ ёһотой гэжэ хэлэгдээ.
— Харин түрэл буряад хэлэн ба уран зохёол һургуулинуудтамнай долоон хоногой 5 хэшээлһээ үсөөн болгогдохо ёһогүй. Энэ асуудалые манай дарга, Болбосоролой болон эрдэм ухаанай сайд Валерий Поздняков өөрөө хинадаг юм, — гээд Балданов тэмдэглээ.
«Буряад хэлэнэй бэшэгэй дүримэй видеозураахай — эхин ба юрэнхы болбосоролой шатануудта түрэл буряад хэлэ ашаг үрэтэйгөөр зааха хэрэгсэлнүүдэй нэгэн» гэһэн элидхэл «Бэлиг» түбэй захиралай орлогшо, Буряад хэлэ хүгжөөлгын Улас түрын түбэй хүтэлбэрилэгшэ, хэлэ бэшэгэй эрдэмэй дид-доктор Оюна Забанова хэһэн байна.
Сахим номоор урилдаанда Буряад Уласай 13 аймагһаа болон ниислэл хотоһоо зуугаад һурагшад хабаадажа мүрысэхэдөө, мэдэсэ шадабария шалган туршаһан байха юм. Түгэсхэлэйнь баяр ёһололдо илаһан һурагшадай багшанарта «Бэлиг» түбһөө ном бэлэгүүд барюулагдаа.
