Хадата Захааминай хоймор талада оршодог сэлгеэн сагаан Санага нютагһаа гарбалтай ирагуу найрагша Санжай-Ханда Дармаевагай «Эрьюулгэ» гэһэн суглуулбари Үндэһэн хэлэнүүдые болон угсаата соёлой зүйл шудалалгые дэмжэхэ талаар Улас түрын «Бэлиг» түбтэ гараба.
Элинсэгэйнгээ эртын галабhаа эрдэни мэтээр энхэрэн абажа ябаһан эхэ хэлэнэйнгээ шэмэ шүүhэ сэдьхэл зүрхэндөө шэнгээжэ үндыhэн хадаа, Санжай-Ханда Дармаева — эдир багаhаа уран гоё, уян нугархай буряад үгэтэй ханилжа, хурса гуурһаяа эрид тэгшэ эршэтэйгээр олон жэлэй туршада барижа ябаһан хүн.
Буряад уран зохёолойнгоо һабагшые алдангүй, ирагуу найруулгануудаа «Сэдьхэлэй уянга», «Эхэ нютаг», «Үлгын дуунай аялга», «Санага. Диваажан ороной ехэ гороо» номуудтаа багтаажа, уншагшадаа баясуулаа.
Мүнөө үшөө нэгэ номынь нара хараба. Энэ суглуулбарида оруулагдаһан шүлэгүүдээ зохёоходоо, ирагуу найрагша уншагшадай зүрхэ сэдьхэл хүдэлгэмөөр хэдэн сэдэбтэ хандана: Эхэ орон, тоонто нютаг, эжы аба, үри хүүгэд, ёһо заншал, түрэл хэлэн болон бусад.
Энээнһээ гадуур ород хэлэнһээ Санжай-Ханда Дармаевагай буряадшалhан Давид Самойловой, Амарсана Улзытуевай, монголһоо буряад хэлэндэ шэлжүүлэн найруулhан Хэнтийн Батхуугай шүлэгүүдые уншажа баясахаар.
Уран үгын дээжэ үлхэн, буряадаараа олон бүтээл зохёожо, түрэл хэлэеэ сахин хүгжөөхэ хүнгэн бэшэ хэрэгтэ ирагуж найрагша горитой ехэ хубитаяа оруулна.
Санжай-Ханда Дармаевагай «Эрьюулгэ» гэhэн ном Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түбтэ бэлдэгдээ. 1000 хэһэгээр хэблэлһээ гаража, уласай болбосоролой эмхи зургаануудаар, номой сангуудаар тараагдаха гээд тэмдэглэлтэй.
