Улас түрын «Бэлиг» түбтэ хэблэгдэһэн «Шэнэхээнэй түүхэһээ» гэһэн һуралсалай ном-хэрэгсэлтэй танилсуулга үсэгэлдэр И.К. Калашниковай нэрэмжэтэ Хотын номой түб санда үнгэрбэ.
Энэ һуралсалай ном-хэрэгсэл согсологшо – Буряад Уласай Үндэһэтэнэй 1-дэхи лицей-интернадай хүмүүжүүлэгшээр хори гаран жэлэй туршада ажаллаһан, мүнөө наһанай амаралтада байһан Шэнэхээнһээ уг гарбалтай Чимит-Цырэн Раднаевна Гармаева мүн. Хүмүүжүүлэгшээр хүдэлмэрилхэ үедөө согсолһон мэдээнүүдээ, өөрынгөө хубиин дүй дүршэлэй дээжэ зохёогшо тус номдоо оруулһан байна.
Энэ ном Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түбтэ бэлдэгдэжэ, урда жэлэй эсэстэ нара хараа һэн гээд һануулая.
Тус ном-хэрэгсэл Шэнэхээнэй буряадуудай түүхэ болон соёлтой, ёһо заншалтай һургуулиин шабинарые танилсуулжа, тэдэниие дэлхэйн арадуудай баялигта хүндэтэйгөөр хандахыень һургажа, оюун сэдьхэлтэй, һургаал ёһо мэдэсэтэй болгохо гэһэн шэглэлтэй согсолбори болоо.
Энээнһээ гадна Шэнэхээн нютаг, тэндэһээ гараһан нэрэтэй түрэтэй хүнүүд тухай мэдээнүүд оронхой. «Шэнэхээнтэй танилсалга», «Шэнэхээн буряадуудай ёһо заншалнууд», «Буряад арадай хубсаһан», «Урлал оёдолдо басагадаа багаһаань дүршэлүүлэе!» гэһэн бүлэгүүдтэ энэ ном хубаарилагданхай юм.
Шэнэ номтой танилсуулгын уулзалгада сугларагшадай урда үгэ хэлэһэн хүн бүхэн Чимит-Цырэн багшын эрдэм мэдэсынь оёоргүй гүнзэгые, найруулан зохёохо абьяас шадабари, баян дүй дүршэл, үхибүүдтэ урин налгайгаар хандадаг, энэрхы дэлгэр сэдьхэлтэй байһые тэмдэглээ.
Улас түрын «Бэлиг» түбэй захирал, Оросой Холбоото Уласай Юрэнхы болбосоролой хүндэтэ хүдэлмэрилэгшэ Баир Балданов Чимит-Цырэн Раднаевнае номойнь мүндэлһэн ушараар амаршалаад, Буряад Уласай һурган хүмүүжүүлгын һалбарида горитой хубитаяа оруулһанайнь, буряад хэлэнэй оршон байгуулжа, һурагшадые түрэл хэлэндэнь дурлуулжа хүмүүжүүлһэнэйнь түлөө баярай бэшэг, номуудые барюулаа.
Чимит-Цырэн Раднаевна Гармаева уулзалгын түгэсхэлэй үедэ үгэ хэлэхэдээ, ном бэлдэжэ хэблүүлхэ гэһэн үүсхэл гаргаһан хүнүүдтэ, Буряад Уласай Болбосоролой болон эрдэм ухаанай сайд Валерий Поздняковто, Улас түрын «Бэлиг» түбэй захиралда болон эрхилэгшэдтэ, хинан заһагшада, хэб бэлдэгшэдтэ, шэмэглэн зохёогшодо баяр баясхалан хүргөө.
