Буряад Уласай hургуулинуудай олон тоото шабинар эдэ үдэрнүүдтэ «Һүүлшын хонхын hайндэртэ» хабаадаба. Багшанар hургаhан, хүмүүжүүлhэн шабинараа далижуулжа, үргэн харгыдань табина, сэдьхэлээ уярлуулан үдэшэнэд.
Эгээл энэ ушараар олондо, тэрэ тоодо буряад хэлэнэй багшанарта, hурагшадта Юрий Энтинэй ба Евгений Крылатовай зохёоhон «Прекрасное далёко» гэжэ дуунай буряадшалагдаhан хубилбари дурадханабди. Оршуулгыень «Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова бүтээhэн юм гэжэ мэдүүлэе.
Мэргэжэлтэ оршуулагшадай һанамжаар, ямаршье хэлэндэ шүлэглэмэл оршуулга хэхэ гээшэ айхабтар орёо юм. Нэн түрүүн үгэнүүдые тэрэ хэбээрнь бэшэ, харин зохёолой удха дамжуулга гол зорилгонуудай нэгэн болоно.
Шүлэг дотор зохёогшын харуулһан дүрэнүүдые эбдэнгүй, уран hайхан юртэмсыень оршуулагдаhан хэлэндэ дамжуулха гээшэ бэлэн хэрэг бэшэ. Тэрээнhээ гадуур, дуунуудые оршуулхадаа, үгэнүүдыень хүгжэмдэ тааруулха тон шухала. «Холын ерээдүй» гэhэн дуун эдэ эрилтэнүүдтэ харюусана гэжэ hанагдана.
Холын ерээдүйдэ эршэтэйгээр энэ үдэрнүүдтэ алхажа гараhан залуушуулдаа арюухан, үргэн hайхан зам, эжы абанар, түрэлхидтэнь амгалан тайбан байдал, багшанартань энхэ элүүрые, абьяас бэлиг хүсэнэбди!
Танай, уншагша олоноймнай, анхаралда, буряадшалагдаһан дуунай шүлэг:
Алас холын ерээдүй
Үгэнь Юрий Энтинэй
Хүгжэмынь Евгений Крылатовай
Сууряатайхан холохон энэ абяае
Эртын шүүдэрхэндэл мэдэрнэлби даа.
Энэ абяан замдаа гарахым уряалжа,
Толгойемни эрьюулжэ манатанал.
Дабталга:
Холын ерээдүймнай, хайрлыш намайгаа,
Хайрлыш намайгаа, намайе хайрлыш.
Арюухан булагhаа холын ерээдүйдэ,
Холын ерээдүйдэ эхилнэб алхамаа.
Зэрэлгээтэ холоhоо энэ абяан
Гайхалтай нютагта урижа байнал.
«Шэнэ үдэрэй түлөө мүнөө үдэр
Ямар юумэ хэжэ байнаш?» — асуунал.
Энхэргэн, сэбэр, зулгы сэдьхэл хэшээн,
Нүхэдөө орхингүй ябахалби даа.
Абяа дуулаад, яаралтайхан сугларналби,
Хүнүүдэй ябаадүй зам харгыгаар …
Оюна Забанова буряадшалба
