Буряад Уласай Толгойлогшо — Засагай газарай Түрүүлэгшэ Алексей Цыденовэй үнгэргэһэн «Түрэл хэлэнэй ба түрэл уран зохёолой эрхим багша» гэһэн Бүгэдэ Оросой мэргэжэлтэ мүрысөө Буряад Уласта үнгэргэлгэдэ бэлдэхэ талаар улас түрын эмхидхэлэй хорооной зүблөөндэ «Бэлиг» түбэй захирал Баир Балданов, захиралай орлогшо Оюна Забанова хабаадабад.
Түрүүшын зүблөөндэ гол түлэб эмхидхэлэй асуудалнууд зүбшэн хэлсэгдээ. Түрэл хэлэнүүдэй эрхим багшанарай ээлжээтэ мүрысөөн ерэхэ намар, һуралсалай жэлэй эхиндэ, Улаан-Үдэ хотодо үнгэргэгдэхэ юм.
Уласай даргын хэлэһээр, бүхы гүрэнэйнгөө эрхим багшанарта болон хүмүүжүүлэгшэдтэ айлшалха, мүрысэхэ үедэнь Буряад оронойнгоо, ниислэл хотынгоо омогорхол болоһон гайхамшагта зүйлнүүдые, буряад арадайнгаа үндэһэн ёһо заншал, түүхэ соёл харуулжа үрдихэ шухала.
Оросой арадуудай түрэл хэлэнүүдэй холбоото уласай институдай захирал Эсет Бокова зүблөөндэ онлайн аргаар хабаадажа, оролто үгэ хэлээ.
Нютаг можонуудтаа шалгарһан багшанар, сэсэрлигүүдэй хүмүүжүүлэгшэд мүрысөөнэй түрүүшын шатада танилсуулгын богонихон ролигуудые зундаа эмхидхэгшэдтэ эльгээжэ, тэдэнь август һарада шүүгшэдэй үзэмжэдэ табигдаха юм. Удаань гүрэнэймнай нютаг можо бүхэнэй эрхим багшанар болон хүмүүжүүлэгшэд Буряадтамнай буужа ерээд, хэдэн үдэрэй туршада бэлиг шадабарияа харуулжа мүрысэхэ.
Буряад Уласай Болбосоролой болон эрдэм ухаанай сайд Валерий Поздняков манай эндэ ябуулагдажа байһан ажал тухай элидхээ.
Мэргэжэлтэ энэ ехэ урилдаанай нээлгын ба хаалгын ёһололнууд Буряадай ниислэлэй театрнуудай нэгэндэ эмхидхэгдэхэ. Хэшээлнүүдые үнгэргэхэ һургуули ба сэсэрлиг шэлэгдэнхэй. Ерэһэн айлшан бүхэниие харгалзалжа туһалха мэргэжэлтэд тодорхойлогдоо гэжэ сайд хэлээ.
Зүбшэн хэлсэлгэдэ «Бэлиг» түбэй захирал Баир Балданов хабаадажа, һанамжа дурадхалаа хэлэһэн байха юм.
