Буряад хэлэнэй үдэртэ зорюулагдажа, Буряад театрта дэлгэгдэһэн үзэсхэлэндэ Улас түрын «Бэлиг» түбэй УМК зохёон бэлдэлгын ба буряад хэлэндэ һургалга оньһожоруулха таһаг түрүүшынгээ бүтээлнүүдэй зариманһаа бүридэһэн дэлгэсэ дурадхаа. Тэрэ тоодо — мүнөө ажаллажа байгаа «Номто.ру» сайт, һаяхана зохёогдоһон «Амар мэндэ-э!» гэһэн сахим ном ба «Бодол» сайт.
Дэлгэсын дэргэдэ ерэжэ хараһан үзэһэн бүхы наһанай зон — залуу хүгшэнгүй — бултадаа һонирхожо, сэсэрлигэй наһанай хүүгэдтэ зорюулагдаһан «Амар мэндэ-э!» гэһэн сахим номой арга боломжонуудые анхарал ехэтэйгээр туршан шалгаа, эхин ба дунда ангинуудай һурагшадай хэрэглэхээр зохёогдоһон «Бодол» сайтын зарим хэсэг сэдэбүүдэйнь боломжонуудтай танилсаһан байна.
Һайндэртэ олоной анхаралда табигдаһан бүтээлнүүд һайшааһан олон тоото һанамжануудые суглуулаа, магтаалда хүртөө. Буряад хэлэндэ һургалга олондо дүтэ, һонирхолтой боложо байна. Тоо оньһоной нөөсэ хэрэгсэл зохёолго гансашье һуралсалай ябаса хүнгэн, зохид болгоно бэшэ, харин һурган хүмүүжүүлэгшын ажал нилээн хурдадхана гэжэ тэмдэглэлтэй. Тоо оньһото болбосоролой оршон зохёон байгуулха ажал дээдын үрэ дүн манда үгэхэ гэжэ мэдэнэбди!
