Ниислэл хотодо соносхогдоһон Буряад хэлэнэй габшагай һарын түгэсхэлэй баяр ёһололдо «Бэлиг» түбэй захирал Баир Балданов хабаадаба.
Тус хэмжээ ябуулга Улаан-Үдын захиргаанай дэргэдэхи буряад хэлэнэй комиссиин нүүдэл зүблөөнтэй хамтаруулагдажа, хотын Хүүгэдэй болон эдиршүүлэй уран бэлигэй ордондо эмхидхэдэһэн байха юм.
Үндэһэн хэлэнэй түсэлнүүдые харуулһан үзэсхэлэн хоёрдохи дабхарта үргэнөөр дэлгэгдэжэ, хотын эмхи зургаануудай туйлалтын гэршэ болоод, сугларагша олоной анхарал татаа.
Ниислэлэй һургуулинууд ба сэсэрлигүүд, соёлой болон бусадшье эмхи зургаанууд өөһэдынгөө ажал, бэелүүлһэн элдэб түсэлнүүдээ, туйлалтануудаа харуулаа.
Улаан-Үдэ хотын Захиргаанай албан ёһоной сайтын олон бүлэгүүд ба хуудаһанууд мүнөө жэл буряадшалагдажа эхилэнхэй. Эхин шатань тус хэмжээ ябуулгын үедэ олоной анхаралда дурадхагдаа. Энэ түсэлдэ Улас түрын «Бэлиг» түбэй Гүрэнэй оршуулгын албан хабаадаа юм гээд тэмдэглэлтэй.
Габшагай һарын баяр ёһололой суглаан найрай түгэсхэлдэ эмхидхэгдээ. Ордоной тайзан дээрэһээ Улаан-Үдэ хотын мэрэй орлогшо Николай Намсараев, һунгамалнуудай зүблэлэй түрүүлэгшэ Чимит Бальжинимаев болон бусад хүтэлбэрилэгшэд үгэ хэлээ.
Улас түрын «Бэлиг» түбэй захирал Баир Балданов сугларһан арад зоноо амаршалхадаа:
— Буряад хэлэнэй оршон Улаан-Үдэдэ һүүлэй хэдэн жэлэй туршада үргэдөө. Ниислэлдэмнай энэ талаар нилээн ехэ ажал хэгдэнэ. Теэд арад зоной дэмжээгүй һаа, засагай хэжэ байһан ажал иимэ амжалтатай байхагүй һэн. Тиимэ ушарһаа бултадаа саашадаа иимэл эбтэйгээр, эршэтэйгээр ажалаа ябуулая,
— гэжэ уряалаа.
Түрэл хэлэнүүдэй түүхэтэ үүргэ сэрэгэй тусхай ябуулгын үедэ эли тодоор харагдаа гэжэ Балданов онсолоо.
— Дайсанай мэдэхэгүй түрэл хэлэн дээрээ ойлголсоод, хамта ябаһан хэды олон дайшалхы нүхэдэйнгөө ами наһа манай хүбүүд абарнагүйб даа! Баатар сэрэгшэдэйнгээ Эхэ оронойнгоо эрхэ сүлөөгэй түлөө иигэжэ тэмсэжэ ябахада, эндээ, нютаг дээрээ байһан зон, бидэ мүн лэ түрэл хэлэнэйнгээ түлөө оролдохо уялгатайбди,
— гээд, Баир Балданов сугларагшадта хандан хэлээ.
Ниислэл хотодо үнгэргэгдэһэн мүрысөөнүүдэй илагшадта бэлэг, шангуудые барюулгын ёһололдо «Бэлиг» түбэй захирал мүн лэ хабаадалсаһан байха юм.
