«Соёл хоорондын харилсаа бэхижүүлгэ болон буряад арадай угай баялиг сахин үлөөлгэ» гэhэн дүхэриг шэрээгэй зүблөөндэ Улас түрын «Бэлиг» түбэй захирал, ВАРК-ын нэгэдэхи дид-юрэнхылэгшэ Баир Балданов хабаадаба. Энэ хэмжээ ябуулга Байгал далайн эрьедэхи Гремячинск тосхондо Буряадай үндэhэн соёлой эблэл эмхидхэhэн байна.
Буряад арадай түлөөлэгшэдэй түрэл нютагhаа холо ажаһуудаг газарнуудта түрэлхи хэлэеэ сахин хамгаалха, соёл хоорондын харилсаанай асуудалнуудые зүбшэн хэлсэлгэдэ Орос гүрэнэй нютаг можонуудта болон хари гүрэнүүдтэ байгуулагдаhан нютаг зоной эблэлнүүдэй хүтэлбэрилэгшэд болон эдэбхитэд хабаадалсаа.
ВАРК-ын юрэнхылэгшэ, Улаан-Үдэ хотын hунгамалнуудай зүблэлэй түрүүлэгшэ Чимит Бальжинимаев, Буряад Уласай Толгойлогшын болон Засагай Газарай Захиргаанай хүтэлбэрилэгшын нэгэдэхи орлогшо Михаил Харитонов айлшадые мэндэшэлэн амаршалаа.
Буряад хэлэ сахин хүгжөөхэ, мүнөө үеын болбосоролой тоо оньhото нөөсэнүүдые бэлдэхэ, буряад хэлэн дээрэ һуралсалай-онол аргын ном зохёол хэблэхэ талаар уласай болбосоролой hалбарида бэелүүлэгдэжэ байһан хэмжээ ябуулганууд тухай Баир Балданов тобшохоноор хөөрэжэ үгэhэн байха юм. Эндэ hая боложо үнгэрһэн томо хэмжээ ябуулга тухайшье хэлээ.
- Арадаймнай алтан үлгы — Буряад орондо үнгэргэгдэһэн Уласхоорондын «Алтаргана» нааданай дүнгүүд бултанай аша туһада алба хэхэ ёһотой. Түрэлхи хэлэ, үндэһэн соёл бллон тамир хүгжөөлгэтэй холбоотой хэмжээ ябуулгануудта ба түсэлнүүдтэ «Дангина» гэһэн мүрысөөндэ илаhан гоо hайхан басагаяа, бүхэ барилдаанай абаргые хабаадуулжа байха дурадхал манай уласай болбосоролой болон эрдэм ухаанай сайд Валерий Анатольевич Поздняков оруулна, — гэжэ «Бэлиг»түбэй захирал онсолоо.
«Алтарганын» мүрысөөнүүдтэ үгтэhэн бүхы уран зохёолой, теле-харилсаанай зүйлнүүдые, кино болон бусад бүтээлнүүдые буряад хэлэ, соёлоо урагшань дабшуулхын тула хэрэглэхэ тухай дурадхал Баир Балданов мүн лэ соносхоо.
