Буряад үндэhэтэнэй «Алтаргана-2026» гэhэн Уласхоорондын XVI нааданай нээлгын баяр ёһолол Буряад Уласай түб стадион дээрэ үсэгэлдэр үдэшэ hүр жабхалантайгаар үнгэрбэ.
Холо ойроһоо буужа ерэһэн буряад угсаатан баярай жагсаалда хабаадаhан байха юм. «Алтаргана» наада анха түрүүшынхиеэ үнгэргэжэ, арадай hайндэрэй эхи табиhан Монгол Уласай бүлэг жагсаалые толгойлжо, тамирай талмай дээрэ түрүүлэн гараа.
Бүгэдэ буряадай үндэhэн соёлой эблэлэй юрэнхылэгшэ Чимит Бальжинимаевай ударидаhан бүлэгтэ манай гүрэнэй 15 нютаг можонуудта, бага ехэ хотонуудта hуурижаhан угсаатанаймнай эблэлнүүдэй түлөөлэгшэд ябалсаа.
Бусад зоноо, бууhан айлшадаа угтан абажа, найр наадаяа зохёожо байhан Буряад оронойхид — уласай Толгойлогшо Алексей Цыденов, Арадай Хуралай түрүүлэгшэ Владимир Павлов болон Оросой Холбоото Уласай Баатар Дашибал Мункожаргалов түрүүтэй Засагай газарай гэшүүд, сайд дарганар, hунгамалнууд, ондо ондоо hалбаринуудай мэдээжэ түлөөлэгшэд нэгэ хэсэг болоод, жагсаалда хабаадаа.
Энэ бүлэгэй бүридэлдэ сайд Валерий Поздняков түрүүтэй болбосоролой hалбариин түлөөлэгшэд — Улас түрын «Бэлиг» түбэй захирал Баир Балданов, Буряадай улас түрын үндэhэтэнэй 1-дэхи лицей-интернадай захирал Булат Шойнжонов, энэл hургуулиин багша, түрэл хэлэнүүдэй багшанарай Бүгэдэ Оросой 2025 оной мүрысөөнэй илагша Светлана Раданжапова гурбан уригдаhан байжа, баярай жагсаалда хабаадаа.
Мүн тиихэдэ бүхы шахуу аймагуудые болон ниислэл хотые түлөөлhэн бүлгэмүүд хойно хойноhоо hубарин гаража, харагшадые мэндэшэлэн ёhолоо.
Оросой Холбоото Уласай нютаг можонуудай — хүршэ Үбэр Байгалай хизаарай, Эрхүүгэй можын түлөөлэгшэдэй бүлгэмүүд мүн лэ гэшхэдэлээ жэгдэлэн, тамирай талмайе бүhэлэн алхалаа.
Үндэр наһатай үльгэршэн үбгэнэй түүрээһэн үльгэрһөө һабагшалан зохёогдоһон һайндэрэй зүжэглэмэл тоглолто «Шэдитэ Алтаргана» гэжэ нэрлэгдэhэн байна. Тэрээндэ манай уласай хоёр мянга гаран зүжэгшэд хабаадана гээд соносхогдоо.
Уржадэр эхилhэн арадай hайндэр «Алтаргана» наадан үшөө хоёр үдэрэй туршада үргэлжэлхэ. Соёл урлалай, ёhо заншалай, hуудал байдалай hалбаринуудаар 18 янзын, тамирай 6 зүйлөөр мүрысөөнүүд эмхидхэгдэхэ юм. «Алтаргана» нааданда дүн хамта таба гаран мянган зон хабаадаха гээд эмхидхэгшэд багсаамжална.
