Мэдээжэ уран зохёолшо, шүлэгшэн Шагдар Байминовай түрэhөөр 100 жэлэй ойдо зорюулжа, «Мүнхын мүрнүүдые заяагша поэт» гэhэн ном Оросой Холбоото Уласай болон Буряад Уласай соёлой габьяата хүдэлмэрилэгшэ, гүрэнэй болон уласай Сэдхүүлшэдэй холбоонуудай гэшүүн, хэлэ бэшэгэй эрдэмэй дид-доктор Туяна Самбялова согсолжо хэблүүлһэн байна. Тус номтой танилсуулгын баяр ёһолол XXXI Номой дугыланай хэмжээндэ Үндэhэтэнэй номой санда үнгэргэгдөө.
Танилсуулгын хэмжээ ябуулгада Улас түрын «Бэлиг» түбэй захиралай орлогшо, хэлэ бэшэгэй эрдэмэй дид-доктор Оюна Забанова хабаадалсаа. Номой согсологшо-редактор Туяна Владимировна Самбяловада тэрэ баяраа мэдүүлээд, «Бэлиг» түбэй зүгhөө гарай бэлэг бариһан байна.
Тус номдо Буряадай арадай поэт Шагдар Байминовай урид хэблэгдээгүй зохёолнуудынь, мэдээжэ шүлэгүүд, поэмэнүүдынь оронхой. Эдээнhээ гадна уран зохёолойнь шэнжэлэлгэ, нүхэдэйнь буряадаар ба ородоор бэшэһэн дурсалганууд болон зорюулганууд согсолборидо багтаһан байха юм.
Буряад уран зохёолой түүхэдэ горитой хубитаяа оруулhан мэдээжэ уран зохёолшо, шүлэгшэн Шагдар Байминовай түрэhөөр 100 жэлэй ой мүнөө жэл тэмдэглэгдэнэ. Тиигэжэ шэнэ номой танилсуулгада ерэhэн айлшадай һонорто Шагдар Байминовай дурасхаалда зорюулагдаhан «Уулын үндэр үбгэн» гэһэн шэнэ дуун зэдэлбэ. Нина Артугаевагай шүлэг дээрэ хүгжэм найруулһан Вера Шобосоева дуугаа өөрөө хангюурдаа.
Улаан-Үдэ хотын 33-дахи гимназиин, мүн 54-дэхи hургуулиин шабинар Шагдар Байминовай шүлэгүүдые уран гоёор уншажа, сугларагшадай шэхэ хужарлуулаа, сэдьхэл баярлуулаа гэжэ онсололтой.
