Улаан-Үдэ хотын захиргаанай дэргэдэхи буряад хэлэнэй талаар комиссиин ээлжээтэ зүблөөндэ Улас түрын «Бэлиг» түбэй захирал Баир Балданов хабаадаба.
Ниислэлэй засаг даргын орлогшо Ирина Ковалёвагай хүтэлбэри доро энэ зүблөөн урда гарагай зургаанда үнгэрhэн байна.
Улаан-Үдэ хотын захиргаанай эмхидхэн байгуулhан «Түрэл хэлэнэй түшэг» гэhэн шан барюулгын баяр ёhолол зүблөөнэй эхиндэ үнгэргэгдөө. Энэ шанда хүртэхын түлөө эмхидхэгдэhэн мүрысөөндэ хабаадагшадта баталамжанууд, гарай бэлэгүүд барюулагдаа.
Хотын захиргаанай олондо мэдээсэл тараадаг албанай болон Соёлой талаар хорооной буряад хэлэ хүгжөөхэ талаар ябуулжа байhан горитой ехэ ажалай hайн дүнгүүд тухай элидхэлнүүдые дарганарынь зүблөөндэ дурадхаа.
Мүн тиихэдэ «Буряад ФМ-эй»ажаябуулгын удха шанар тухай, арад зоной ажабайдалда үзүүлдэг нүлөө тухайнь радиосубагай захирал Жанна Дымчикова хөөрэhэн байха юм.
Элидхэлнүүдые зүбшэн хэлсэлгэдэ Баир Балданов хабаадажа, хэгдэжэ байгаа ажалай дүнгүүдые тэмдэглээд, үшөө саашаа тэрэниие мүлихэ тухай дурадхалнуудые оруулаа.
