Банзарай Доржын нэрэмжэтэ Буряадай гүрэнэй ехэ һургуулида эхилһэн түрэлхи хэлэнэй үдэрнүүдые нээлгын баяр ёһололдо Улас түрын «Бэлиг» түбэй захирал Баир Балданов мүнөөдэр хабаадаба.
Сугларһан багшанарта, оюутадта, айлшадта амаршалгын үгэ хэлэн хандахадаа, Оросой Холбоото Уласай Юрэнхылэгшэ Владимир Путинай баталһан Гүрэнэй хэлэнэй бодолгын үндэһэ һуури, тэрэниие бэелүүлхэ талаар холбоото уласай Засагай газарай мүнөө жэл баталһан түсэб тухай тэрэ онсолон тэмдэглээ.
- Буряад Уластамнай түрэл хэлэнүүдые дэмжэлгэ мүн лэ гүрэнэй хэмжээндэ эрхилэгдэдэг. Мүнөөшье үнгэргэгдэжэ байһан хэмжээ ябуулгада буряад хэлэ сахин хүгжөөлгын программаар Болбосоролой болон эрдэм ухаанай яаман мүнгэн тэдхэмжэ һомолонхой. Сайд Валерий Анатольевич Поздняковой зүгһөө таниие мүн лэ амаршалан мэндэшэлнэб, амжалта хүсэнэб, — гэжэ Баир Балданов хэлэһэн байна.
Ехэ hургуулиин дид-захирал, түүхын эрдэмэй доктор, доцент Виктория Номогоева, Буряад хэлэнэй болон уран зохёолой дээдын hургуулиин захирал, гүрэнэй бодолгын эрдэмэй дид-доктор, доцент Гарма-Ханда Гунжитова гэгшэд баяр ёhололдо мүн лэ амаршалгын үгэ хэлээ.
Түрэлхи хэлэнэй үндэр удха шанар тухай, мүн тиихэдэ тэрэниие дэлгэрүүлхэ, сахин хүгжөөхэ талаар БГУ-гай ябуулдаг ажал тухай дарганар онсолжо тэмдэглэhэн байха юм.
Улас дотор соносхогдоhон заншалта габшагай hарын үедэ БГУ-да түрэл хэлэндэ зорюулагдаhан хэмжээ ябуулгануудай үлхөө үнгэргэгдэхэ юм. Тэрэ тоодо — нютаг можонууд хоорондын IV «Эрхим буряад» гэhэн олимпиада. Энэ удаа тус хэмжээ ябуулга Орос гүрэнэй арадуудай эб нэгэдэлэй жэлдэ зорюулагдаха.
«Монгол туургата арадуудай хэлэн-аман зохёол-уран зохёол түүхэтэ болон мүнөө үеын оршондо» гэhэн оюутадай Уласхоорондын III олимпиада агууехэ шүлэгшэн Үлзытын Дондогой 90 жэлэй ойн баярта зорюулагдан үнгэргэгдэхөөр хараалагдана.
