Улас түрын «Бэлиг» түбтэ бэлдэгдэжэ хэблэгдэһэн «Yндэр үүргэ» / «Высокая миссия» гэһэн согсолборитой танилсуулга үсэгэлдэр Үндэһэтэнэй номой санда үнгэрбэ.
Буряад арадаймнай дээжэ хүбүүдэй нэгэн, гүрэн түрын мэдээжэ ажаябуулагша Баир Баторович Жалсановай гэрэлтэ дурасхаалда зорюулагдажа, түрэһөөрнь 50 жэлэй ойтой дашарамдуулагдаһан энэ суглуулбари согсологшод – Улас түрын «Бэлиг» түбэй захирал, Оросой Холбоото Уласай Юрэнхы болбосоролой хүндэтэ хүдэлмэрилэгшэ Баир Балданов ба хинан заhалгын-хэблэлэй таhагай дарга, хэлэ бэшэгэй дид-доктор Оюна Цыцыкова гэгшэд мүн.
— Энэ номой ашаар бидэ бүхы наһаяа арад зондоо зорюулһан хүндэ хүндэлэлэй ёһо үзүүлхэ хүсэлтэйбди. Эндэ элитэ хүн байһан тэрэнэй зан абариие олон талаһаа харуулһан шухаг баримтанууд суглуулагданхай, — гээд оролто үгэ дотор Буряад Уласай Болбосоролой болон эрдэм ухаанай сайд Валерий Поздняков тэмдэглэнэ.
«Yндэр үүргэ / Высокая миссия» ном Болбосоролой болон эрдэм ухаанай яаманай шиидхэбэреэр «Бэлиг» түбтэ оройдоол хоёр һарын туршада бэлдэгдэжэ, нара хараба гээд тэмдэглэлтэй. Тус хэблэл дотор Баир Жалсановай гэр бүлын гэшүүдэй, түрэл гаралайнь, суг һураһан нүхэдэйнь, багшанар болон нютагаархидай, оюутан хаһын нүхэдэйнь, ажал нэгэтэнэй дулаахан дурсалганууд оруулагдаа. Тиихэдээ тус дурсалганууд, олондо мэдээсэл тараадаг хэрэгсэлнүүдтэ тунхаглагдаһан толилолгонууд гүнзэгы удхатай гаршагуудтай бүлэгүүд боложо хубаарилагдаһан байха юм.
Энээхэн шэнэ номтой танилсуулгын уулзалгада сугларагшадай урда үгэ хэлэһэн хүн бүхэн Баир Баторовичай энэрхы дэлгэр сэдьхэлэй хэды шэнээн уужам байһые, Эхэ зургаан зүйл хамаг амитанда хандажа, хайрлажа, туһалжа ябадагые, гүнзэгы эрдэм мэдэсэтэй, баян дүй дүршэлтэй байһые тэмдэглээ.
Баир Баторовичай эжы Ганжитма Цыреторовна Жалсанова уулзалгада хабаадажа, үгэ хэлэхэдээ, Буряад Уласай Болбосоролой болон эрдэм ухаанай сайд Валерий Поздняковто, ном бэлдэжэ хэблүүлхэ гэһэн үүсхэл гаргаһан хүнүүдтэ, дулаахан дурсалгануудаа эльгээһэн бүхы бэшэгшэдтэ, барлахын урдахи бэлэдхэлэй ажал ябуулһан «Бэлиг» түбэйхидтэ – согсологшодто, хинан заһагшадта, хэб бэлдэгшэдтэ, шэмэглэн зохёогшодто баяр баясхалан хүргөө.
