«Түрэл хэлэнэй болон түрэл уран зохёолой эрхим багша» гэһэн Бүгэдэ оросой мэргэжэлтэ мүрысөөнэй шүүгшэдые Улас түрын «Бэлиг» түбэйхид үнгэрэгшэ амаралтада, үсэгэлдэр угтабад.
Буряад Уласай Болбосоролой болон эрдэм ухаанай яаманай шиидхэбэреэр «Бэлиг» түб мүрысөөнэй шүүгшэд боложо, хүршэ Саха (Яхад) Уласһаа морилжо ерэһэн эрдэмтэ багшанарые угтаха даабаритай байгаа. М.К. Аммосовой нэрэмжэтэ Баруун-Хойто федеральна ехэ һургуулиин багшанар, һурган хүмүүжүүлгын эрдэмэй дид-докторнууд, һалбариин декан Светлана Фёдорова, мүн тиихэдэ Аксинья Обутова гэгшэд түрүүлэн ерээ. Энэ хоёр шүүгшэ Бүгэдэ оросой мүрысөөндэ хабаадаха түрэл хэлэнэй багшанарай бэлиг шадабари хаража сэгнэхэ юм.
Харин хүүгэдэй сэсэрлигэй хүмүүжүүлэгшэд ба түрэл хэлэнэй багшанарай мүрысөөниие шүүхэ хоёр мэргэжэлтэд — II дугаар С.Н. Донскойн нэрэмжэтэ Болбосорол хүгжөөлгын ба мэргэжэл дээшэлүүлгын дээдэ һургуулиин дид-захирал Ольга Михалёва, мүн тиихэдэ Амгын аймагай Амга һууринай «Хатынчаана» гэһэн хүүгэдэй сэсэрлигэй бэеын тамирай багша Рустам Седых гэгшэд удаа дараалан, Улаан-Үдэдэмнай хүрэжэ ерэһэн байха юм.
Саха (Яхад) Уласай Эрдэмэй академиин Түрэл хэлэнүүдые шудалалгын ба сахин хүгжөөлгын түбэй хүтэлбэрилэгшэ, һурган хүмүүжүүлгын эрдэмэй доктор, профессор, Саха (Яхад) Уласай Эрдэмэй академиин бодото гэшүүн — академик Феодосия Габышева үдэшэ орой Улаан-Үдэдэмнай буужа, хүндэтэ айлшамнай болоо. Феодосия Васильевна мүрысөөнэй һүүлшын шатые хаража сэгнэхэ эгээл хүндэтэй Томо жюриин гэшүүн юм.
Агаарай онгосын Уласхоорондын «Байгал» буудалда хүндэтэ айлшадаа «Бэлиг» түбэйхид угтан абаад, гараһан долоон хоногой туршада байрлажа, мүрысөөнэй хэмжээ ябуулгада хабаадахадань, туһаламжа үзүүлхэ болоно.
