Доржо Банзаровай нэрэмжэтэ Буряадай гүрэнэй ехэ һургуулиин Түүхын ба хэлэ бэшэгэй дээдэ һургуулиин эмхидхэһэн Эрдэм мэдэсын үдэртэ зорюулагдаһан баяр ёһололой хэмжээ ябуулгада Улас түрын «Бэлиг» түбэй захирал Баир Балданов хабаадаа.
Дунда һургуулияа түгэсэһэнэй удаа дээдын эрдэм олохо гэжэ эрмэлзээд, Буряадай гүрэнэй ехэ һургуулинн богоһо алхажа ороһон нэгэдэхи шатын гүлмэрхэн оюутадые ехэ һургуулиин хүтэлбэрилэгшэд, уригдаһан айлшад амаршалжа, ажабайдалай үргэн замда гараһан тэдэндэ амжалта хүсөө.
Сугларагшадай урда үгэ хэлэхэдээ, буряад хэлэнэй багшанарай мэргэжэлдэ һураха дуратайшуулда Буряад Уласай Толгойлогшын, Арадай Хуралай, Засагай газарай, Болбосоролой болон эрдэм ухаанай яаманай зүгһөө үзүүлэгдэдэг дэмжэлгэ тухай «Бэлиг» түбэй захирал хөөрөө.
— Түрэл хэлэнэймнай хүгжэлтэдэ уласаймнай засагай зүгһөө онсо анхарал хандуулагдана. Олон оюутадай түрэлхид, эсэгэнэр ба ахайнар сэрэгэй тусхай ябуулгада хабаадажа, Эхэ оронойнгоо түлөө ами наһаяа гамнагүй тэмсэнэд. Иимэ үе сагта бултанаймнай харюусалга горитой. Манай хэрэг ябадал зүб, Илалта туйлахабди, — гээд Баир Балданов хэлэһэн байха юм.
