Үндэһэн хэлэнүүдые болон угсаата соёлой бусад зүйл шудалалгые дэмжэхэ талаар Улас түрын «Бэлиг» түбэй хинан заhалгын-хэблэлэй таhагай дарга, хэлэ бэшэгэй эрдэмэй дид-доктор Оюна Цыцыкова Буряадай гүрэнэй телевидениин «Амар мэндэ, Буряадни» дамжуулгада хабаадаба.
Сэдхүүлшэн Намжилма Цыденовагай эмхидхэһэн хөөрэлдөөн Бүгэдэ буряадай «Эрдэм» диктантда зорюулагдаһан байгаа.
Байгша оной мартын 14-дэ боложо үнгэрhэн Бүхэдэлхэйн хэмжээнэй «Эрдэм» диктант хэнэй үүсхэлээр, ямар зорилготойгоор бэелүүлэгдэдэг түсэл бэ, хэн тэрэниие эмхидхэнэб, хаана үнгэргэгдэдэг бэ, ямар зон хабаадаха аргатайб гэхэ мэтын hонирхолтой асуудалнуудта Оюна Цыцыкова харюусаа.
Мүн тиихэдэ мүнөө жэл диктант бэшэлгэдэ хэд хабаадааб, ямар дүнгүүдые туйлааб, хэзээ бүхы дүнгүүд элирхэб гэжэ харагшадта хөөрөө. Мүнөө жэл Улас түрын «Бэлиг» түбэйхид диктант бэшэлгэдэ өөһэдөө эдэбхитэйгээр хабаадажа, үндэр сэгнэлтэнүүдтэ хүртөө гээд онсолоо.
Жэлһээ жэлдэ диктант бэшэхэ дуратайшуулай тоогой олошоржо байһан ушар хадаа арад зоной, үхибүүдэй, залуу үетэнэй үндэhэн хэлэндээ дуратайгаар хүмүүжэжэ, тэрэнээрээ һонирходогые, жэнхэни буряадаараа уран хурсаар, уян нугалбаритайгаар дуугаржа hураха хүсэлтэй байһые гэршэлнэ гээд Оюна Цыцыкова хөөрэhэн байха юм.
Хөөрэлдөө https://vkvideo.ru/video-10231784_456260752 хаягаар эшэ татажа харахада болохо.
