Элитэ ехэ эрдэмтэн, хэлэ бэшэгэй эрдэмэй доктор, профессор Лубсан Доржиевич Шагдаровай түрэһөөр 95 жэлэй болон Вандан Юмсуновай найруулан бэшэһэн «Хориин арбан нэгэн эсэгын уг изагуурай туужын» 150 жэлэй ойн баярта зорюулагдажа, үнгэрэгшэ долооной эсэстэ эмхидхэгдэһэн Уласхоорондын эрдэмэй — дадалай бага хуралда Улас түрын «Бэлиг» түбэй захирал Баир Балданов хабаадаба.
Буряад Уласай Болбосоролой болон эрдэм ухаанай сайд Валерий Поздняковой зүгһөө, мүн тиихэдэ толгойлдог эмхи зургаанайнгаа үмэнэһөө хабаадагшадые мэндэшэлээд, эрдэмэй хуралай амжалта түгэс үнгэрхэнь дамжаггүй гээд Баир Балданов амаршалаа.
Оросой Эрдэмэй академиин Сибириин таһагай Монгол арадуудай, буддын шажанай болон түбэд судлалай хүреэлэнэй үүсхэн эмхидхэһэн энэ хэмжээ ябуулгые Буряад Уласай Засагай газар дэмжэһэн юм. Тэрэниие үнгэргэлгэдэ «Буряад хэлэ сахин хүгжөөлгэ» гэһэн Гүрэнэй программаар Болбосоролой болон эрдэм ухаанай яаман мүнгэ һомолоо гэжэ тэмдэглэлтэй.
— Түрэл һайхан буряад хэлэеэ бүхы наһаараа шэнжэлжэ, ерээдүйн үенүүдтэ Лубсан Доржиевич Шагдаровай орхиһон уг залгамжын баялиг зүйлынь айхабтар ехэ. Маанарай, мэргэжэлтэ багшанарай болон оршуулагшадай, сэдхүүлшэд болон бусад эдэбхитэдэй үдэр бүриингөө ажалда хэрэглэжэ байдаг ород-буряад, буряад-ород толинуудынь хэды ехэ сэнтэй гээшэб! — гэжэ «Бэлиг» түбэй захирал онсолон хэлэһэн байна.
Хоёр үдэрэй туршада Буряад Уласай ниислэлдэ үнгэргэгдэһэн эрдэмэй энэ хурал хоёр хэсэгээр эмхидхэгдээ. Монгол хэлэнүүдые мүнөө үедэ шэнжэлэлгэдэ, мүн тиихэдэ монгол арадуудай бэшэмэл уг баялигта тэдэ зорюулагдаһан байгаа.
