Улас түрын «Бэлиг» түбэй захирал Баир Балданов, захиралай орлогшо, Буряад хэлэ сахин хүгжөөлгын түбэй хүтэлбэрилэгшэ Оюна Забанова хоёр «Буряад ТВ» телесубагай эмхидхэhэн дүхэриг шэрээдэ үсэгэлдэр хабаадаа.
Үхибүүдэй дунда үнгэргэгдэдэг видеобуулгабаринуудай «Найдал» мүрысөөн тухай зүбшэн хэлсэлгэ болоhон байна. Дүрбэдэхи жэлээ үнгэргэгдэхэеэ байһан энэ хэмжээ ябуулга мүнөө үеын хүүгэдэй дунда түрэл хэлыень дэлгэрүүлхэ, тэдэниие һонирхуулха, шэнын арга зүй хэрэглэн, хэлэлгыень хүгжөөхэ талаар горитой ехэ удха шанартай юм.
Дүхэриг шэрээдэ хабаадаһан Буряад Уласай Болбосоролой болон эрдэм ухаанай сайд Валерий Поздняковой хэлэһээр, энэ мүрысөөниие яаман дэмжэдэг. Саашадаашье дэмжэжэ, эрхимлэһэн хүүгэдые шагнаха, урмашуулха мүнгэ буряад хэлэ сахин хүгжөөлгын программаһаа һомолжо байха гэжэ сайд найдуулаа.
- Түрэлхи хэлэнэйнгээ шахардуу байдалда ороод байхада, тэрээндэ ургажа ябаһан үеын түлөөлэгшэдые — мүнөөдэрэй һурагшадые, үглөөдэрэй эхэ эсэгэнэрые дурлуулха, зүбөөр хэрэглэжэ һургаха ажалда энэ мүрысөөн айхабтар ехэ туһа үзүүлнэ. Тиихэдээ мүнөө үеын хүүгэдэй һайн таниха, мэдэхэ, үдэр бүри хэрэглэдэг арга зүйн ашаар — гар утаһаар буулгабари хүүлэхэдэ, хабаадагшадта һонирхолтой. Тиимэһээ «Найдал» мүрысөөндэ хабаадаха дуратайшуулай тоогой жэлһээ жэлдэ олошоржо байһаниинь гайхалгүй, — гээд «Бэлиг» түбэй захирал Баир Балданов тэмдэглэнэ.
Мүнөө жэл үнгэргэгдэхэеэ байһан мүрысөөнэй шангай жаса хахад сая түхэригтэ хүрэхэ гэжэ эмхидхэн байгуулагшад дүхэриг шэрээгэй хабаадагшадта дуулгаа. Эбээн тэдхэгшэдэй тоодо Бүгэдэ буряадай үндэһэн соёлой эблэл оролсоно гэжэ онсолон тэмдэглэхээр.
