«Бэлиг» түбэй бэлдэһэн «Шэнэ номой шэрын хангал», «Түрэл хэлэнүүдые үзэлгэдэ «Бэлиг» түбэй туһаламжа» гэһэн нэрэтэй хоёр үзэмжэ Буряад хэлэнэй үдэртэ хабаадагшадай анхарал татаа.
Һургуулиин урдахи болбосоролой, эхин, дунда болон дээдэ hургуулинуудта хүүгэдэй, оюутадай үзэхэ, уншаха номууд, hуралсалай программанууд, багшанарай хэрэглэхэ онол аргын заабаринууд, угсаатанай заншалта һурган хүмүүжүүлгэ болон багшын эрдэмээр, үхибүүдтэ зорюулагдаhан уран зохёолой болон бусад буряад, ород, эвенк, hоёд хэлэнүүд дээрэ барлагдаhан номууд үзэмжэдэ табигдаһан байгаа.
Заримыень нэрлэбэл, бага ангинуудай һурагшадта зорюулагдаһан «Ород-буряад-англи хэлэнүүдэй зурагта толи» (согсологшонь – Э.С. Булхарова), «Үнгэтэ юртэмсэ» гэһэн карточкануудай суглуулбари (согсологшодынь – О.Д. Сандакова, О.В. Цыцыкова), «Буряад хэлэнэй зүб бэшэлгын толи» (харюусалгата эрхилэгшэ – Б.Д. Цыренов), 2-4 ангинуудай һурагшадта зорюулагдаһан «Ород-буряад тайлбари толи» (согсологшодынь – С.Ц. Содномов болон бусад), «Шэнэхээнэй түүхэһээ: һуралсалай ном-хэрэгсэл» (согсологшонь – Ч.-Ц.Р. Гармаева), «Амитад тухай шүлэгүүд» (зохёогшо – Д.В. Шойнжонова) гэһэн номууд болоно.
Энээнһээ гадна һүүлэй үедэ хэблэн гаргаһан Гүрэнэй hуралсалай шэнэ заршамай эрилтээр шэнэлэгдэһэн hуралсалай-онол аргын хүсэд суглуулбаринуудые болон багшанарта туhаламжа болохо элдэб хэрэгсэлнүүдые, заабариин материалнууд дурадхагдаа. Тэрэ тоодо — һоёд хэлээр 1-2-дохи ангинуудта үзэхэ, мүн тиихэдэ гүрэнэй буряад хэлээр һуралсалай номууд.
Yхибүүдые, залуу үетэниие үндэhэн хэлэндэнь дуратайгаар хүмүүжүүлхын, жэнхэни буряадаараа уран хурсаар, уян нугалбаритайгаар хэлүүлжэ hургахын тула «Бэлиг» түбэй хэблэн гаргадаг номууд һайндэртэ хабаадагшадые һонирхуулаа.
