«Шэнэхээнэй түүхэһээ» гэһэн ном-хэрэгсэл «Бэлиг» түбтэ хэблэгдээ

Буряад Уласай Үндэһэтэнэй 1-дэхи лицей-интернадай хүмүүжүүлэгшээр олон жэлдэ ажаллаһан, мүнөө наһанай амаралтада байһан Шэнэхээнһээ уг гарбалтай Чимит-Цырэн Раднаевна Гармаева «Шэнэхээнэй түүхэһээ» гэһэн һуралсалай ном-хэрэгсэл Буряад Уласай Болбосоролой болон эрдэм ухаанай яаманай баталһан түсэбөөр Улас түрын «Бэлиг» түбтэ урда жэлэй эсэстэ нара хараа һэн.
Һурган хүмүүжүүлгын ажалай ветеран Чимит-Цырэн Гармаева дүшэ гаран жэлэй туршада хүмүүжүүлэгшээр хүдэлмэрилхэ үедөө согсолһон мэдээнүүдээ, өөрынгөө хубиин дүй дүршэлэй дээжэ тус номдоо оруулһан байна.
Шэнэхээн буряадуудай түүхэ болон соёлтой, ёһо заншалтай танилсуулжа, тэдэниие дэлхэйн арадуудай баялигта хүндэтэйгөөр хандахыень һургуулиин шабинарые һургажа, оюун сэдьхэлтэй, һургаал ёһо мэдэсэтэй болгохо гэһэн шэглэлтэй согсолбори болоо. Энээнһээ гадна Шэнэхээн нютаг, тэндэһээ гараһан нэрэтэй түрэтэй хүнүүд тухай мэдээнүүд оронхой.
Һуралсалай талаар энэ ном-хэрэгсэлэй заршамынь хадаа дүршэл дадалай хэшээлнүүдээр буряад хубсаһанай илгарал болон түхэлнүүдтэй, оёдол болон тэрэнэй янзануудтай танилсуулга мүн. Тиихэдээ һурагшадай буряад арад зонойнгоо оршон тойронхи ажабайдалые ойлгоходонь, мүн саашань дүршэлөө хэрэглэхэдэнь, ехэ туһа хүргэхэ жэшээтэй. Гадна хүүгэдые болбосоруулха, хүмүүжүүлхэ хэрэгтэ туһалха арга боломжотой.
«Шэнэхээнтэй танилсалга», «Шэнэхээн буряадуудай ёһо заншалнууд», «Буряад арадай хубсаһан», «Урлал оёдолдо басагадаа багаһаань дүршэлүүлэе!» гэһэн бүлэгүүдээр энээхэн ном хубаарилагданхай юм.
Тус номтой танилсахадаа, уншагшад нэн түрүүн Чимит-Цырэн Гармаевагай эрдэм мэдэсынь оёоргүй гүнзэгые, найруулан зохёохо абьяас шадабарииень мэдэрхэ байха гэжэ найдагдана.
Һуралсалай ном-хэрэгсэл 6-7-дохи ангинуудай һурагшадай, тэдэнэртэй ажаллажа байгаа багшанарай болон хүмүүжүүлэгшэдэй, үргэн уншагшадай hонирхол заатагүй татаха байха.
Шэнэ ном-хэрэгсэлэй сахим хэбынь Улас түрын «Бэлиг» түбтэ бэлдэгдэһэн байна. «Буряад Уласта буряад хэлэ сахин хүгжөөлгэ» гэһэн Гүрэнэй программада һомологдоһон мүнгөөр тэдэ барлагдаба гээд тэмдэглэлтэй. Номууд болбосоролой эмхи зургаануудаар тараагдаха.