Улас түрын «Бэлиг» түбэй захирал Баир Балданов албанай хэрэгээр Хориин аймаг ошожо, түрэл буряад хэлээр ба уран зохёолоор 5-дахи ангида үзэхэ һуралсалай номуудые Дарма Жанаевай нэрэмжэтэ Хориин юрэнхы болбосоролой 1-дэхи дунда һургуулида дамжуулаа.
Буряад Уласай Үндэһэтэнэй 1-дэхи лицей-интернадай захирал, Угсаата соёлой шэглэлтэй болбосоролой эмхинүүдэй эблэлэй түрүүлэгшэ Булат Шойнжоновтой хамта Дарма Жанаевай нэрэмжэтэ һургуулида Хориин аймагай захиргаанай хүтэлбэрилэгшын орлогшо Элеонора Ламхановатай, һургуулиин захирал Баир Гомбоевтой, тэрэнэй орлогшонортой уулзажа, буряад хэлэ ба уран зохёол зааха асуудалнуудаар ажалай зүблөө үнгэргөө.
Энэ һургуулида дүрбэн жэлэй саада тээ түрэл буряад хэлэн түрүүшынхиеэ заагдажа эхилһэн байгаа. Анхан гүрэнэй хэлэнэй программаар заагдадаг һаань, үхибүүдээ түрэл хэлэндэнь гүнзэгыгөөр һургахаяа, дурлуулхаяа хүсэһэн түрэлхидэй мэдүүлгэнүүдые суглуулжа, нэгэ анги бүридүүлһэн байгаа. Тэдэ һурагшад мүнөө 5-дахи ангида орохоёо ябана. Теэд һургуули табан үдэрэй түсэбөөр ажалладаг хадаа, буряад хэлэнэй ба уран зохёолой хэшээлнүүдые үсөөхэнөөр хубаарилха баатай байһанаа мэдүүлээ. Ябан-ошон энэ ангияа хаахашье гэһэн дурадхалнууд дуулдана.
— Эхилһэн юумые болюулхань хүнгэн, дахяад һэргээхэнь хүшэр байха. Энэ ажалаа заатагүй үргэлжэлүүлыт, түрэл хэлэ заалгын асуудалнай уласай толгойлогшо Алексей Цыденовэй хубиин харгалзалга доро байдаг. Һуралсалай шэнэ жэлдэ 5-дахи ангиин һурагшадайтнай үзэхэ номуудые зорюута шэнээр хэблүүлжэ асараабди, — гэжэ «Бэлиг» түбэй захирал Баир Балданов һургуулиин хүтэлбэрилэгшэдтэ хандаа.
— Манай һургуулиин жэшээ хараадаа абажа, һуралсалай ажаябуулга түсэблэлгын дүршэл хэрэглэхэдэтнай болохо. Тиигээдшье, Буряад Уласай Угсаата соёлой шэглэлтэй болбосоролой эмхинүүдэй эблэлдэ һургуулитнай мүнөө жэл оруулагдаба. Эблэлэй бүридэлдэ ороһон эмхинүүдтэ түрэл буряад хэлэнэй ба уран зохёолой байдал доройтуулагдаха ёһогүй, — гэжэ эблэлэй түрүүлэгшэ, Буряад Уласай Үндэһэтэнэй 1-дэхи лицей-интернадай захирал Булат Шойнжонов тэмдэглээ.
Һуралсалай түсэбэй хэды орёогоор табигдадагшье һаа, аргыень олоод ажаллажа байгаа уласаймнай болбосоролой 105 эмхиин үндэһэн хэлэ ба уран зохёол зааха талаар дүршэл бусад һургуулинуудта жэшээ болохо гэжэ найдагдана.
