Урда долоондо Буряадай ниислэл Улаан-Үдэдэ үнгэргэгдэһэн Бүгэдэ Оросой мэргэжэлтэ «Түрэл хэлэнэй болон түрэл уран зохёолой эрхим багша» мүрысөөндэ хабаадахаяа Хальмаг Уласһаа ерэһэн түлөөлэгшэд, жюриин гэшүүд «Бэлиг» түб руу айлшалан ерээ.
Хальмаг Уласай Болбосоролой болон эрдэм ухаанай яаманай мэргэжэлтэ дунда, нютаг можын болбосоролой болон эрдэм ухаанай таһагай дарга Зоя Убушиева, тэрэл таһагай хүтэлэгшэ мэргэжэлтэн Баира Агуляева ба Элһэтэ хотын 24-дэхи хүүгэдэй сэсэрлигэй багша Екатерина Балакаева гурбан Улас түрын «Бэлиг» түбэй ажалтай танилсаа.
Захирал Баир Балданов суг ажалтантаяа – таһагуудай дарганартай хамта айлшадые угтан абаад, толгойлжо байһан эмхи зургаанайнгаа ажаябуулгын шэглэлнүүд тухай хөөрэһэн байна. Баруун монгол арадай түлөөлэгшэд эмхи зургаанаймнай таһагуудаар, ажалай танхимуудаар ябажа хараа, өөһэдынгөө уласта ябуулагдажа байдаг ажал тухай хөөрөө.
Үнгэрэгшэ жэлдэ Улас түрын «Бэлиг» түб Хальмаг хэлэнэй түб хоёр хоорондоо тусхай хэлсээ баталжа, аха дүү арадуудай хоорондохи харилсаа холбоо бэхижүүлхэ, түрэл хэлэнүүдээ сахин хүгжөөхын тулада бүтээжэ байһан ажалайнгаа дүй дүршэлөөр хубаалдаха гэжэ шиидэһэн юм.
Илангаяа мүнөө үеын хурдан арга зүй хэрэглэн, сахим юртэмсэ руу хэлэнүүдээ нэбтэрүүлхэ талаар аха дүү арадайнгаа мэргэжэлтэдтэй харилсаатайгаар ажалаа ябуулжа эхилэнхэйбди, — гээд «Бэлигэй» захирал тэмдэглэнэ.
Уулзалгын үедэ угтагшад айлшадтаа гарай бэлэгүүдые барюулаа, хүндын шэрээдэ һуулгажа, халуун сайнгаа, амтан эдеэнэйнгээ дээжэ дурадхаһан байха юм.
