Улас түрын «Бэлиг» түбэй захирал Баир Балданов Орос гүрэнэй арадуудай түрэл хэлэнүүдэй холбоото уласай институдай хүтэлбэрилэгшэд болон мэргэжэлтэдтэй ажалай шууд асуудалнуудаар уулзалгануудые үнгэргэбэ.
Холбоото уласай тус эмхи зургаанай захиралай орлогшонор Саргылана Брызгалова, Марина Мизова, таһагай дарга Сара Додуева гурбантай уласаймнай болбосоролой һалбариин шухала нэгэ хэсэг болодог түрэл хэлэнүүдэй асуудалнууд зүбшэн хэлсэгдэһэн байха юм.
Тодорхойлбол, тус институдай бэлдэн гаргадаг болоһон сахим сэдхүүлэй түрүүшын дугаарта хэблэгдэхэ толилолго тухай, мүн баһа түрэл буряад хэлэнэй 5-9-дэхи ангинуудта үзэхэ һургуулиин номуудые бэлдэлгэ тухай хөөрэлдөөн болоо.
Ерэхэ намар Буряад орондомнай үнгэргэгдэхөөр түсэблэгдэһэн «Түрэлхи хэлэнэй ба түрэлхи уран зохёолой эрхим багша» гэһэн гүрэн түрын хэмжээнэй мүрысөөндэ бэлдэлгын энэ уулзалганууд дээрэ мүн лэ асуудалнууд зүбшэн хэлсэгдээ.
Буряад, эвенк болон һоёд хэлэнүүдые сахин хүгжөөхэ талаар хамтаржа ажаллаха тухай хэлсээн Орос гүрэнэй арадуудай түрэл хэлэнүүдэй холбоото уласай институт ба Улас түрын «Бэлиг» түб хоёрой хоорондо 2024 оной эхиндэ баталагдаа һэн гээд һануулая. Тус хэлсээ бэелүүлхэ талаар ажал жэлэй туршада ябуулагдаа, саашадаашье ашаг үрэтэйгөөр үргэлжэлүүлэгдэхэ гээд энэ удаа хэлэгдэһэн байха юм.
