Буряад Уласай Болбосоролой болон эрдэм ухаанай сайд Валерий Поздняковой үнгэргэhэн ажалай зүблөөндэ Улас түрын «Бэлиг» түбэй захирал Баир Балданов хабаадаа.
Энэ суглаанда түрэл хэлэнүүдые hургуулинуудта заалга шэнэ дүримөөр эмхидхэхэ тухай хөөрэлдөөн болоhон байна.
Гүрэнэй Гэгээрэлэй яаманай шиидхэбэреэр һуралсалай шэнэ жэлһээ 1-дэхи ангида түрэл хэлэнүүдэй оройдоол 1 хэшээл долоон хоногой туршада үнгэргэхэ саг үгтэһэн юм.
Дутаһан сагыень хэшээлһээ гадуур ажаябуулгын түсэбтэ оруулха гэгдээ. Энэ шиидхэбэри хайшан гэжэ бэелүүлхэ тухай, хэшээлһээ гадуур үнгэргэгдэдэг ажаябуулгын түлөө багшанарай салин хүлһэ яажа түлэхэб гэһэн асуудалнуудай гараһаниинь гайхалгүй.
Хэшээлэй ба классһаа гадуур ажалай түлбэриин хоорондо горитой ехэ илгаатай байһаниинь мэдээжэ.
Мүн тиихэдэ табан хоног ажалладаг һургуулинуудай түсэбтэ түрэл хэлэнүүдэй хоёршье хэшээл багтахаяа болинхой. Харин зургаан хоногой түсэбтэ сагынь багтадагшье һаа, бусад гаргашануудынь ехэ.
Эдэ мэтэ орёо асуудалнуудые зүблөөн дээрэ зүбшэн хэлсэгдээ.
Түрэл хэлэнүүдые зааха долоон хоногой 5 саг тэрэ хэбээрнь орхихо, гүрэнэй буряад хэлэ долоон хоногой 2 хэшээлһээ үсөөн байха ёһогүй гэһэн шиидхэбэримнай хүсэндөө зандаа гээд болбосоролой сайд зүблөөн дээрэ тэмдэглээ.
Хэшээлһээ гадуур ажаябуулгада оруулагдаһан сагай түлбэриин хэмжээ тодорхойлоод, бюджедтэ мүнгэ нэмэжэ һомолхо тухай дурадхал бэлдэхээрнь яаманай албануудта даабари үгтөө.
