Түрэл хэлэнүүдые hургуулида зааха ажалай программануудые шэнэлхэ талаар онлайн-зүблөө Улас түрын «Бэлиг» түб үсэгэлдэр эмхидхээ. Түбэй захирал Баир Балданов тэрэниие хүтэлһэн байна.
Оросой Холбоото Уласай арадуудай түрэл хэлэнүүдэй хүреэлэнэй хандалгаар анхан баталагдаһан программууд намар болотор шэнэлэгдэхэ зэргэтэй. Тиихэдээ һүүлэй хэдэн жэлэй туршада хубилгагдаһан эрилтэнүүдтэ тэдэ зохилдуулагдаха болоно.
Буряад Уласай Болбосоролой болон эрдэм ухаанай яаманай захилаар буряад хэлэ болон уран зохёол зааха программануудые хэр угһаа хойшо Доржо Банзаровай нэрэмжэтэ Буряадай гүрэнэй ехэ һургуулиин Буряад хэлэнэй болон уран зохёолой дээдын һургуулиин эрдэмтэ багшанар уласай дунда һургуулинуудай мэдээжэ түрүү багшанаратай хамтаржа зохёодог юм.
«Бэлиг» түбэй захиралай мэдээсэһээр, үсөөн тоото үндэһэн арадуудай — эвенкнүүдэй болон һоёдуудай — түрэл хэлэнүүдээр мүн лэ сагтаа тааруу программанууд тухай хөөрэлдөөн болоо.
Суглаанда хабаадагшадай зүбшэн хэлсэлгын дүнгүүдээр зохисотой шиидхэбэринүүд абтаа. Һуралсалай шэнэ жэлэй эхилтэр хамаг программанууд шэнэлэгдээд байха ёһотой.
— Эвенк хэлэнэй болон уран зохёолой программануудаар асуудал үгы, тэдэ булта шэнэлэгдэнхэй, — гээд БГУ-гай доцент, хэлэ бэшэгэй эрдэмэй дид-доктор Елизавета Афанасьева зүблөөнэй үедэ дуулгаа.
Харин һоёд хэлэ заалгын программа шэнэлхэ хэрэгтэй. Анхан тэрэниие мүн лэ Буряадай гүрэнэй ехэ һургуулиин багшанар зохёон бэшэһэн гээд мэдээжэ. Зохилдуулгын энэ ажал мүн лэ эрхилэгдэхэ болоно.
— Буряадаймнай үндэһэн арадуудай түрэл хэлэнүүдтэ горитой анхарал хандуулагдана. Теэд тэдэнээ сахин хүгжөөхэ, ерээдүйн үенүүдтэ дамжуулха хэрэгтэ һургуулида заалгын нүлөө сэгнэшэгүй ехэ. Тиимэһээ бидэнэй харюусалга баһал горитой, энэ ажалаа эб хамта эрхимээр бүтээел даа, — гээд Баир Балданов эрдэмтэ багшанарта хандаһан байха юм.
