Буряад хэлэ сахин хүгжөөлгэ гэһэн Гүрэнэй программа болбосоролой болон эрдэм ухаанай һалбарида 2025 ондо бэелүүлхэ асуудалаар суглаа яаманда сайд Валерий Поздняковой хүтэлбэри доро мүнөөдэр үнгэргэгдэбэ. Тэрээндэ Улас түрын «Бэлиг» түбэй захирал Баир Балданов, захиралай орлогшо Оюна Забанова хабаадабад.
Буряад хэлэнэй болон уран зохёолой ерээдүйн багшанарые Д.Банзарова нэрэмжэтэ Буряадай гүрэнэй ехэ һургуулида бэлдэлгэ хубилгагдаха болобо. Холбоото уласай бюджедһээ багшанарай бэлэдхэлдэ мүнгэн ехэшэгээр һомологдодог болоо. Тиигээд улас түрын бюджедэй сүлөө үлэжэ үгэхэ алмалтын мүнгэ бусад зүйлнүүдые эхин ангинуудта буряадаар зааха багшанарай бэлдэхэлдэ, мүн түрэл хэлэеэ тоо оньһондо оруулха талаар ажалда һомолхо тухай шидхэбэри абтаба.
Буряад хэлэ түрэл хэлэнэй программаар заадаг һургуулинуудта иимэ түсэл һаяын жэлнүүдтэ бэелүүлэгдэжэ эхилхэ шиидхэбэри намартаа абтаа һэн гэжэ һануулая.
«Эрхим багша» ба «Эрхим хүмүүжүүлэгшэ» гэһэн мүрысөөнүүдые бэлдэжэ үнгэргэхэ талаар эмхидхэлэй бүлэг яаманда байгуулагдаха. Мүнөө жэл энэ мүрысөөнүүд хамтадхагдажа, Бүхэросиин мүрысөөнэй хэбээр март һарада уласай хэмжээндэ үнгэргэгдэхэ юм. Тиихэдээ ерэхэ намар Буряад орондо үнгэргэгдэхэ гүрэнэй хэмжээнэй мүрысөөнэй бэлдэхэл ба гол туршалга болохо ёһотой.
— Бүхэросиин мүрысөө эмхидхэхэ гээшэ айхабтар харюусалгатай хэрэг. Тиимэһээ тон һайнаар бэлдэхэ шухала, — гээд сайд Валерий Поздняков тэмдэглээ.
