Нютаг можонууд хоорондын ниигэмэй болон эдэй засагай талаар холбоо харилсаануудай «Сибириин хэлсээн» эблэлэй (МАСС-ай) Болбосорол болон эрдэм ухаанай талаар харгалзалгын зүблэлэй дэргэдэхи Сибириин болон Алас Дурнын арадуудай түрэл хэлэнүүдэй талаар ажалай бүлэгэй онлайн аргаар эмхидхэгдэһэн зүблөөндэ Улас түрын «Бэлиг» түбэй захирал Баир Балданов хабаадаа.
Тус зүблөөн Ажалай бүлэгэй хүтэлбэрилэгшэ, мэдээжэ эрдэмтэн, һурган хүмүүжүүлгын эрдэмэй доктор, Саха (Яхад) Уласай Эрдэмэй академиин бодото гэшүүн, Түрэл хэлэнүүдые шэнжэлэлгын ба сахин хүгжөөлгын түбэй дарга, профессор Феодосия Габышевагай хүтэлбэри доро үнгэрөө.
Гүрэн түрын хэмжээндэ арадуудай хэлэнүүд тухай хуули шэнээр зохёогдожо захалаад, зүбшэн хэлсэлгэ аргааханаар эмхидэгдэнэ гэлэй.
Гүрэн түрэдэмнай ажаһуудаг үндэһэн арадуудай түлөөлэгшэд энэ асуудалда онсо анхаралаа юундэ хандуулнаб гэхэдэ, «түрэл» хэлэн гэһэн ойлгосые болюулжа, ондоо ойлгосонуудаар һэлгэхэ дурадхал хуулиин түлэб дотор дурадхагдаа бшуу.
Һургуулида үзэгдэдэг «Түрэлхи хэлэн», «Түрэлхи уран зохёол» гэһэн зүйлнүүдэй нэрэнүүдые һэлгэжэ, «Оросой арадай хэлэн», «Оросой арадай хэлэн дээрэхи уран зохёол» гэһэн нэрэ үгэхэ тухай захиралтын түлэб Оросой Холбоото Уласай Гэгээрэлэй яаман зохёожо, олоной үзэмжэдэ табяа.
Эдэ түлэбүүдтэ өөһэдынгөө харша хандаса МАСС-ай Ажалай бүлэгэй гэшүүд эли тодоор тодорхойлоо.
— Ямаршье арад өөрын түрэл хэлэтэй. Манай гүрэнэй эрхэтэн бүхэн өөрынгөө түрэл хэлээр һураха, болбосорхо, үри хүүгэдээ хүмүүжүүлхэ эрхэтэй. Энэ эрхэмнай Эхэ ороноймнай — Оросой Холбоото Уласай Үндэһэн хууляар олгогдонхой ха юм. Гүрэнэймнай Юрэнхылэгшэ Владимир Владимирович Путин үндэһэн арадуудай хэлэнүүдые сахин хүгжөөхэ тухай нэгэнтэ бэшэ хэлэдэг. «Түрэл хэлэн» гэһэн ойлгосо хуулита шиидхэбэринүүдээр үгы хэхэ, ямаршье ондоо үгөөр һэлгэхэ һэдэлгэ — гажа буруу ябадал болоно, Үндэһэн хууляар баталагдаһан гол дүримүүдэй нэгэнтэй зохилдоногүй, — гээд, зүблөөн дээрэ үгэ хэлэхэдээ, «Бэлиг» түбэй захирал Баир Балданов тэмдэглээ.
Хуулита шиидхэбэринүүдэй түлэбүүдые бэлдэһэн холбоото уласай засагай зургаануудта һанамжа дурадхалнуудаа эльгээхэ гэжэ Ажалай бүлэгэй зүблөөн дээрэ хэлсэгдээ.
