Тэбэг наада һэргээжэ, арад соогоо дахяад дэлгэрүүлхэ гэһэн үүсхэл зүбшэн хэлсэхэ дүхэриг шэрээдэ Улас түрын «Бэлиг» түбэй захирал Баир Балданов хабаадаба. «Буряад ТВ» телесубагай хүтэлбэрилэгшэ Виталий Раднаевай энэ нааданай нэгэдэл байгуулха дурадхалаа сугларагшадта хөөрөө.
— Үхибүүн наһандаа үдэр бүри наадажа ябаһан наадамнай гансал гуталай хашааһа һалгааха арга бэшэ, ургажа ябаһан бэеымнай тамирта айхабтар һайн нүлөө үзүүлдэг байһан гээшэ. Мүнөөнэй сагай үхибүүдтэ тэнхээ тамираа һайжаруулхадань сэгнэшэгүй туһа болохо жэшээтэй. Тиимэһээ тэбэг наада һэргээжэ, арад соогоо дэлгэрүүлхэ үүсхэл тон зүб, тэрэниие ехэтэ дэмжэнэб, — гээд Баир Балданов тэмдэглээ.
«Бэлиг» түбэй захирал зүбшэн хэлсэлгэдэ хабаадахадаа, дурадхагдаһан зүйлнүүдээр һанамжаяа элирхэйлэн хэлэһэн байна.
Жэшээлхэдэ, нааданай нэрые «тэбэг» зандань орхёод, харин сохидог тэрэнээ «зоос» гэжэ баталха тухай дурадхал дэмжээ.
Адуунай арһаар зоос хэхэ бэшэ, харин ута нооһотой хониной хүдэһэндэ шудхагдаһан туулган түмэр нүхэлжэ оёод бүтээхэ хэрэгтэй гэжэ Баир Балданов хэлэһэн байха юм.
Һаяын сагта гүрэнэй хуулиин ёһоор тэбэг нааданай ниитын эмхи байгуулагдажа, мүрысөөнүүд эмхидэгдэхээр хараалагдана. Тамирай, Болбосоролой болон эрдэм ухаанай яамануудай туһаламжа дэмжэлгэ хэрэгтэй гээд дүхэриг шэрээдэ хэлэгдээ.
