Улас түрын «Бэлиг» түб Буряад үндэhэтэнэй «Алтаргана–2026» гэhэн Уласхоорондын XVI нааданай түсэбөөр үнгэргэгдэһэн номой мүрысөөнэй илагшын нэрэ зэргэдэ хүртэбэ.
«Буряад хэлэн дээрэ эрхим ном. Оршуулгын зохёол» гэһэн номинацида Чингиз Айтматовай «Пегий пёс, бегущий краем моря» туужын буряад хэлэн оршуулагдаһан «Далайн эрье зубшан гүйжэ ябадаг Алаг нохой» гэһэн номой түлөө «Бэлиг» түб номой мүрысөөнэй Илагшын үргэмжэлэл болон шанда хүртэбэ.
Энэ ном мэдээжэ ирагуу найрагша, Оросой Холбоото Уласай болон Буряад Уласай соёлой габьяата хүдэлмэрилэгшэ, Орос Уласай Сэдхүүлшэдэй холбооной гэшүүн Николай Чимитович Шабаев ород хэлэнһээ буряадшалаа.
Урда долооной эсэстэ Буряадай ниислэл хотын Зүблэлтын талмай дээрэ үнгэргэгдэһэн «Алтарганын» зохёохы мүрысөөнүүдтэ илагшадые шагналгын ёһололой үедэ «Бэлиг» түбэй захирал Баир Балдановта шан барюулагдаа.
– Гүрэнэй, улас түрын болон нютаг можонууд хоорондын хэмжээнэй түсэлнүүдтэ «Бэлиг» түбнай һүүлэй үедэ эдэбхитэйгээр хабаадана. Мүнөөшье, Буряад үндэhэтэнэй «Алтаргана–2026» гэhэн Уласхоорондын XVI нааданай үедэ амжалтатайгаар ажаллажа байһанаа батадхабабди. Энэ туйлалтамнай зүб замаар ябаhыемнай гэршэлнэ. Эбтэй эетэй суг ажалтанаа бултыень амаршалнаб, эрхим хүндэтэ оршуулагша Николай Чимитович Шабаевта баяраа мэдүүлнэб, — гэжэ «Бэлигэй»захирал онсолhон байха юм.
